वैदेशिक रोजगार विभागले विदेशी विमानस्थल प्रयोग गरी श्रमिक पठाउने १५६ म्यानपावर कम्पनीलाई कारबाही गरेपछि वैदेशिक रोजगार व्यवसायी आन्दोलित भएका छन्। व्यवसायीहरूले उक्त कारबाही फिर्ता नलिए श्रमिकलाई वैदेशिक रोजगारीमा पठाउने कार्य पूर्ण रूपमा बन्द गर्ने चेतावनी दिएका छन्। संघका अध्यक्ष डिकबहादुर खत्रीले भने, ‘अहिले आएर त्यही आधारमा कारबाही गर्नु भनेको सरकारी संयन्त्र बीचको समन्वय अभाव र व्यवसायीमाथिको अन्याय हो।’ ३१ असार, काठमाडौं।
विदेशी विमानस्थल प्रयोग गरेर श्रमिक पठाएको भन्दै म्यानपावर कम्पनीमाथि वैदेशिक रोजगार विभागले गरेको कारबाहीले तरंग पैदा गरेको छ। व्यवसायीहरूले सो कारबाही फिर्ता नलिए श्रमिक पठाउन ठप्प पार्ने चेतावनी दिएका छन्। उनीहरूले कारबाही फिर्ताका लागि सम्बन्धित निकायमा ध्यानाकर्षण गराउँदै आएका छन्। निर्णय फिर्ता नलिएको खण्डमा श्रमिकलाई वैदेशिक रोजगारीमा पठाउन बन्द गर्ने चेतावनी दिएका छन्।
भारतीय विमानस्थल प्रयोग गरेर श्रमिकहरूलाई वैदेशिक रोजगारीमा पठाउने १५६ म्यानपावरलाई विभागले कारबाही गरेको थियो। विभागले २०८२ को चैत १ गतेदेखि २०८३ को जेठ ३१ गतेसम्म श्रम स्वीकृति लिइ वैदेशिक रोजगारीमा पठाएका श्रमिकको उडानको विवरण माग गरेको थियो। जसमा सञ्चालनमा रहेका १ हजार १ सय १७ वटा म्यानपावरमध्ये ६७८ ले विवरण उपलब्ध गराएका थिए। विभागले कारबाही गरेपछि म्यानपावर व्यवसायी आक्रोशित बनेका छन्। सरकारले जबरजस्ती एकलौटी ढंगबाट कारबाही गरेको भन्दै फिर्ता लिन माग गर्दै आएका छन्।
नेपाल वैदेशिक रोजगार व्यवसायी संघले विभागका महानिर्देशक मिरा आचार्य, श्रम मन्त्री रामजी यादव र श्रम सचिव डाक्टर दीपक काफ्लेसँग भेटेर आफ्ना विषय राखिसकेको छ। संघका अध्यक्ष खत्रीले भने, ‘यदि सरकारले यो अन्यायपूर्ण कारबाही फिर्ता लिँदैन भने हामी पूर्ण रूपमा श्रमिक पठाउन बन्द गर्न बाध्य हुनेछौँ। ९० प्रतिशत व्यवसायी अहिले ‘शून्य अवस्था’ मानेर श्रमिक नपठाउने पक्षमा हुनुहुन्छ।’
सम्बन्धित खबर
