सूचना तथा सञ्चार मन्त्रालयले नेपाल दूरसञ्चार प्राधिकरणमा चार नयाँ सदस्यहरू नियुक्त गरेको छ। प्राधिकरणमा क्षेत्रगोपाल प्रधान, अनन्त मल्लिक, निलमकुमार ओझा र सुजिता श्रेष्ठ सदस्यका रूपमा नियुक्त भएका छन्। सञ्चारमन्त्री डा. विक्रम तिमिल्सिनाले नवनियुक्त सदस्यहरूलाई देश र जनतालाई केन्द्रमा राखेर नतिजामुखी भएर जिम्मेवारी निर्वाह गर्न निर्देशन दिनुभएको छ। (३२ असार, काठमाडौं)
नेपाल दूरसञ्चार प्राधिकरणमा चार सदस्यहरू नियुक्ति भएका छन्। सूचना तथा सञ्चार मन्त्रीस्तरको निर्णयअनुसार प्राधिकरणमा चार जना नयाँ सदस्य थपिएका छन्। प्राधिकरणको लेखा तथा लेखापरीक्षणतर्फ क्षेत्रगोपाल प्रधान, प्राविधिक तथा प्रशासनतर्फ अनन्त मल्लिक, कानुनतर्फ निलमकुमार ओझा र बजार व्यवस्थापनतर्फ सुजिता श्रेष्ठ सदस्य पदमा नियुक्त भएका छन्।
नवनियुक्त सदस्यहरूलाई निर्देशन दिनुहुँदै सूचना तथा सञ्चार मन्त्री डा. विक्रम तिमिल्सिनाले प्राधिकरण दूरसञ्चार क्षेत्रको विकास, विस्तार तथा नियमनसँग प्रत्यक्ष रूपमा जोडिएको महत्वपूर्ण निकाय भएकाले देश र जनतालाई केन्द्रमा राखेर जिम्मेवारी निर्वाह गर्नुपर्ने बताउनुभएको छ। ‘तपाईंहरू जस संस्थाका लागि काम गर्नुहुन्छ, त्यहाँ देश र जनतालाई केन्द्रमा राखेर काम गर्नुहोस्। यो संस्था र पद अत्यन्त महत्वका साथ हेरिएको हो। तपाईंहरूको कामले भविष्यको दूरसञ्चार क्षेत्रको विकास निर्धारण गर्ने भएकाले जिम्मेवार र नतिजामुखी भएर काम गर्नुस्,’ सञ्चारमन्त्री डा. तिमिल्सिनाले भन्नुभयो।
