इन्डोनेसियालाई पराजित गर्दै नेपाल तेस्रो स्थानमा

नेपाली महिला यू-१९ क्रिकेट टोलीले एसीसी यू–१९ महिला प्रिमियर कपमा इन्डोनेसियालाई ९ विकेटले हराउँदै तेस्रो स्थान हासिल गरेको छ। इन्डोनेसियाले दिएको ६९ रनको विजय लक्ष्य नेपालले १४ दशमलव २ ओभरमा मात्र १ विकेट गुमाएर पूरा गरेको छ। मनिषा उपाध्यायले ४ ओभरमा मात्र ७ रन खर्चेर ४ विकेट लिएर इन्डोनेसियालाई ६८ रनमा समेटिन्।

२ साउन, काठमाडौं। शनिबार सम्पन्न खेलमा नेपालले इन्डोनेसियालाई ९ विकेटले पराजित गर्दै तेस्रो स्थान सुरक्षित गरेको हो। इन्डोनेसियाले दिएको ६९ रनको लक्ष्य नेपालले १४.२ ओभरमा १ विकेट गुमाएर पूरा गर्यो। सना प्रवीण २५ रन बनाउँदै अविजित रहिन्। साबित्री धामीले २४ रन र करुना बिष्टले १६ रन बनाउँदै अविजित रहे।

पहिले टस जितेर ब्याटिङ गरेको इन्डोनेसिया टोलीले २० ओभरमा ९ विकेट गुमाएर ६८ रन मात्र बनाउन सक्यो। डेरनी राम्बुले अविजित ३४ रन पुर्याइन् भने नि पुतु एलिनले ११ रन बनाइन्। अन्य खेलाडीले दोहोरो अंकको स्कोर बनाउन सकेनन्। नेपालका लागि मनिषा उपाध्यायले ४ ओभरमा ७ रन खर्चेर ४ विकेट लिए। अनु कडायतले २ विकेट लिइन् भने तिर्सना बिक, सोनी पाख्रिन र रचना चौधरीले १–१ विकेट लिए। नेपाल यसअघि शुक्रबार सेमिफाइनलमा यूएईसँग सुपर ओभरमा पराजित भएको थियो। यूएई र थाइल्यान्ड आज उपाधिका लागि प्रतिस्पर्धा गर्दै छन्। नेपालले यू-१९ एसिया कपका लागि पहिले नै छनोट पाइसकेको छ।