क्यानडासँग वनजंगलको हेरचाह नगरेको आरोपसहित ट्रम्पको नयाँ ट्यारिफ लगाउने धम्की

२ साउन, काठमाडौं । अमेरिकी राष्ट्रपति डोनाल्ड ट्रम्पले क्यानडाले वनजंगलको उचित व्यवस्थापन नगरेको आरोप लगाउँदै नयाँ ट्यारिफ लगाउने धम्की दिएका छन् । उनले क्यानडाको वनजंगलको लापरबाहीका कारण अमेरिकामा प्रदूषित हावा आउने समस्या सिर्जना भएको उल्लेख गरेका छन् । यस विषयमा क्यानडालाई जिम्मेवार ठहर्याउँदै नयाँ शुल्क अर्थात् ट्यारिफ लगाउने चेतावनी दिएका छन् ।

‘हामी क्यानडालाई यसको लागि जिम्मेवार मान्छौं कि उसले आफ्नो वनजंगलको उचित हेरचाह गरिरहेको छैन,’ ट्रम्पले ट्रुथ सोसलमा लेखेका छन्, ‘यसले अमेरिकामा फोहोर, प्रदूषित र हानिकारक हावा प्रवेश गराइरहेको छ । यस्तो हावाको गुणस्तर खतरनाक छ र यो अस्वीकार्य छ ।’ उनले चाँडै क्यानडाका प्रधानमन्त्री मार्क कार्नीसित यस विषयमा वार्ता गर्ने र जवाफ माग्ने बताए ।

‘यो जानाजानी गरिएको लापरबाही हो र यस्ता घटना हरेक वर्ष दोहोरिन थालेका छन् । यसले अमेरिकालाई अर्बौं डलरको आर्थिक नोक्सान पुर्याइरहेको छ । प्रदूषणको यो क्षतिको मूल्य निर्धारण गरी क्यानडामा लाग्ने ट्यारिफमा थपिनुपर्छ,’ ट्रम्पले बताए । उक्त समयमा क्यानडाका सयौं वनजंगलमा डढेलो लागेको छ र त्यसको धुँवाले उत्तरी अमेरिकाको ठूलो क्षेत्रमा प्रभाव पारिरहेको छ । क्यानडाका प्रधानमन्त्री मार्क कार्नीले जलवायु परिवर्तनको सामना गर्न क्यानडा र अमेरिकाबीच साझा जिम्मेवारी रहेको बताइसकेका छन् ।

ट्रम्पको यो बयानपछि क्यानडाका आपत्कालीन व्यवस्थापन मन्त्रीहरूले दुवै देशले प्राकृतिक विपद् व्यवस्थापनका लागि निरन्तर सम्पर्कमा रहने प्रतिबद्धता जनाएका छन् । उनीहरूले दुई देशबीचको सहकार्यको लामो इतिहास औंल्याउँदै सन् १९८२ को अग्नि नियन्त्रण समझदारी र सन् २०२५ मा सम्पन्न जी–७ सम्मेलनमा भएको विपद् सहयोग सम्झौतासमेत स्मरण गराएका छन् ।