समाचार सारांश विश्वकप २०२६ को फाइनलमा सोमबार बिहान अर्जेन्टिना र स्पेन उपाधिका लागि आमनेसामने हुनेछन्। लियोनल मेसीको आक्रमणलाई रोक्न स्पेनका लापोर्टे, कुबार्सी र रोड्रीको रक्षापंक्तिले महत्वपूर्ण भूमिका खेल्नेछन्। खेलको नतिजा निर्धारण गर्न दुवै टोलीका मिडफिल्डर र गोलकिपरको व्यक्तिगत प्रतिस्पर्धा निर्णायक हुनेछ। २ साउन, काठमाडौं । विश्वकप २०२६ को उपाधि सोमबार बिहान अर्जेन्टिना र स्पेनमध्ये एकले उचाल्नेछ। दुई उत्कृष्ट टोलीबीचको यो भिडन्त केवल रणनीति र टोलीको खेलमा मात्र सीमित नहुने, मैदानमा केहिले बहुदा व्यक्तिगत द्वन्द्वहरूले पनि खेलको दिशा निर्धारण गर्ने सक्ने छन्। फाइनल खेलमा उपाधिको छिनोफानो गर्न महत्त्वपूर्ण भूमिका खेल्ने पाँच मुख्य भिडन्तका विषयमा यहाँ चर्चा गरेका छौं।
मेसी विरुद्ध स्पेनको डिफेन्स ३९ वर्षे अर्जेन्टिनी कप्तान लियोनल मेसी विश्वकपकै सबैभन्दा प्रभावशाली खेलाडीमध्ये एक मानिन्छन्। उनी ८ गोल गर्दै गोल्डेन बुटको दौडमा अघि छन् र ४ असिस्ट पनि गरिसकेका छन्। प्रतियोगिताको इतिहासकै सबैभन्दा धेरै गोल गर्ने मेसीले इंग्ल्यान्डविरुद्धको सेमिफाइनलमा दुई असिस्ट गर्दै खेलको दिशा नै फराकिलो रुपमा परिवर्तन गरेका थिए। स्पेनका लागि मेसीलाई रोक्नु सबैभन्दा ठूलो चुनौती हुनेछ। त्यसका लागि आयमेरिक लापोर्टे, युवा सेन्टरब्याक पाउ कुबार्सी र कप्तान रोड्रीको सामूहिक भूमिका निर्णायक हुनेछ। स्पेनले यस विश्वकपमा सात खेलमा केवल एक गोल मात्र चुकाएको छ, जसले उसको रक्षापंक्तिको मजबुती स्पष्ट पार्छ।
रोड्री विरुद्ध एन्जो फर्नान्डेज विश्व फुटबलका दुई उत्कृष्ट मिडफिल्डर आमनेसामने हुँदैछन्। स्पेनका कप्तान रोड्रीले प्रतियोगितामा सबैभन्दा धेरै ६४८ सफल पास पुरा गरेका छन्। उनको पास सफलताको दर ९३ प्रतिशत छ। सबैभन्दा धेरै दूरीमा पनि रोड्री नै अघि छन्। खेलको गति नियन्त्रण गर्ने र विपक्षीको आक्रमण रोक्ने जिम्मेवारी उनकै काँधमा हुनेछ। उता अर्जेन्टिनाका एन्जो फर्नान्डेजले पुनः विश्वकपमा आफ्नो स्तर प्रमाणित गरेका छन्। उनले टोलीका लागि सबैभन्दा धेरै ४३ पटक बल पुनः प्राप्त गरेका छन्। नकआउट चरणमा इजिप्ट र इंग्ल्यान्डविरुद्ध निर्णायक गोल गर्दै टोलीलाई फाइनलसम्म पुर्याउन ठूलो योगदान दिएका छन्।
लामिन यमाल विरुद्ध अर्जेन्टाइन डिफेन्स स्पेनका १९ वर्षीय स्टार लामिन यामाल चोटबाट पूनः फर्किएपछि नकआउट चरणमा क्रमशः राम्रो लयमा आएका छन्। फ्रान्सविरुद्धको सेमिफाइनलमा उनले पेनाल्टी दिलाए साथै निरन्तर दबाब सिर्जना गरे। यमाललाई रोक्ने जिम्मेवारी मुख्य रूपमा बायाँ फुलब्याक निकोलस टालियाफिकोको हुनेछ। विश्वकप जितिसकेका अनुभवी टालियाफिको एक-एकका क्रममा डिफेन्समा अत्यन्त प्रभावशाली मानिन्छन्। आवश्यक परेमा नाहुएल मोलिनाले पनि उनलाई डबल मार्किङ गर्नुपर्ने हुनसक्छ।
अल्भारेज–लाउतारो विरुद्ध स्पेनका सेन्टरब्याक अर्जेन्टिनाको सबैभन्दा ठूलो आक्रमण गर्ने हतियारमध्ये एक यो जोडी हो। जुलियन अल्भारेजको अथक दौड, प्रेसिङ र खाली स्थान सिर्जना गर्ने क्षमता साथै सुपर सबका रूपमा लगातार निर्णायक बनेका लाउतारो मार्टिनेज स्पेनका लागि ठूलो चुनौती हुन्। इंग्ल्यान्डविरुद्ध पनि लाउतारो बेन्चबाट आएर विजयी गोल गरेर चर्चित बने। यी दुईलाई रोक्नको जिम्मेवारी लापोर्टे र कुबार्सीको हुनेछ। उनीहरूले प्रतियोगिताभर उत्कृष्ट तालमेल प्रस्तुत गरेका छन्। स्पेनले सात खेलमा केवल एक गोल मात्र चुकाएको मुख्य कारण यही सेन्टरब्याक जोडी हो।
एमिलियानो मार्टिनेज विरुद्ध उनाइ सिमोन फाइनलको अर्को निर्णायक द्वन्द्व गोलपोस्ट अगाडि हुनेछ। अर्जेन्टिनाका एमिलियानो ‘डिबु’ मार्टिनेज विश्व फुटबलकै उत्कृष्ट गोलकिपरहरू मध्येको एक हुन्। विश्वकप, कोपा अमेरिका तथा पेनाल्टी सुटआउटमा उनको प्रभावशाली प्रदर्शनले उनलाई ठूलो खेलका विशेषज्ञको रुपमा स्थापित गरेको छ। स्पेनका उनाइ सिमोन पनि पछिल्ला वर्षहरूमा ला लिगाका सबैभन्दा भरपर्दो गोलकिपरमध्ये एक बनेका छन्। उत्कृष्ट पोजिसनिङ, बल वितरण र महत्वपूर्ण बचाउनुलाई कारण उनले स्पेनलाई प्रतियोगिताभर केवल एक गोल मात्र पसेको बनाएका छन्। यदि खेल अतिरिक्त समय वा पेनाल्टी सुटआउटसम्म पुगेमा यी दुई गोलकिपर मध्य कसले ठूलो बचाउ गर्छ भन्ने कुरा नै विश्वकप उपाधि निर्धारण गर्न सक्छ।
