नेकपा एमालेकी उपनेता पद्मा अर्यालले संसदलाई जनताको आवाज उठाउने र सरकारलाई सचेत गराउने सशक्त मंचको रूपमा स्थापित गर्नुपर्नेमा जोड दिनुभयो। उहाँले सांसदहरूको प्रस्तावना बौद्धिक, तार्किक र तथ्यमा आधारित हुनुपर्ने भन्दै पार्टी नेतृत्वले आवश्यक अध्ययन र परामर्शमा पूर्ण समर्थन गर्ने प्रतिबद्धता व्यक्त गर्नुभयो। अर्यालले भने, “सरकारले गलत काम गर्दा संसदबाट प्रभावकारी सचेत गराउँदै त्यसलाई सही मार्गमा ल्याउनु अहिलेको मुख्य प्राथमिकता हो।”
३ साउन, काठमाडौं। नेकपा एमाले संसदीय दलकी उपनेता तथा पार्टी सचिव पद्मा अर्यालले संसदलाई जनताको आवाज प्रभावकारी रूपमा प्रतिनिधित्व गर्ने र सरकारलाई आवश्यक सचेत गराउने सशक्त थलोको रूपमा स्थापित गर्नुपर्ने बताउनुभयो। आइतबार काठमाडौंमा सांसदहरूका लागि आयोजित अन्तरक्रिया कार्यक्रममा बोल्दै उहाँले अहिलेको संसद विशेष परिस्थिति भएकोले यसलाई अझ विशेष र प्रभावकारी बनाउन सबैको साझा प्रयास आवाश्यक रहेको बताउनुभयो।
अर्यालले भन्नुभयो, “हामीले वर्तमान विशेष अवस्थाको संसदलाई विशेष बनाउन चाहन्छौं। यसको लागि हाम्रो प्रयास मात्र पर्याप्त हुँदैन। यसमा साथीहरूको सहयोग अत्यन्त महत्वपूर्ण हुन्छ।” उहाँले संसदमार्फत जनताको समस्या र आवाज सरकारसम्म पुगाउनु, आफ्ना कुरा जनस्तरमा पुर्याएको अनुभूति दिलाउनु र सामाजिक, राष्ट्रिय तथा अन्तर्राष्ट्रिय मुद्दाहरूमा पार्टीको दृष्टिकोण स्पष्ट रूपमा स्थापित गर्नु आवश्यक रहेकोमा जोड दिनुभयो।
