स्याङ्जा जिल्ला ट्राफिक प्रहरी कार्यालयले गत आर्थिक वर्षमा ट्राफिक नियम उल्लंघन गर्ने १३ हजार ५५१ सवारीसाधनलाई कारबाही गर्दै एक करोड १५ लाख ३० हजार रुपैयाँ राजस्व संकलन गरेको छ। कारबाहीमा परेका सवारीसाधन र संकलित राजस्व गत वर्षको तुलनामा घटेको छ भने दुर्घटनामा ९ जनाको मृत्यु र ४७ जना घाइते भएका छन्। प्रहरी नायब निरीक्षक नरेन्द्रबहादुर शाहीले ट्राफिक कारबाहीको मुख्य उद्देश्य राजस्व संकलन नभई सडक दुर्घटना न्यूनीकरण र अनुशासन कायम गर्नु रहेको बताएका छन्। ४ साउन, स्याङ्जा।
जिल्ला ट्राफिक प्रहरी कार्यालय स्याङ्जाले एक वर्षमा ट्राफिक नियम उल्लंघन गर्ने सवारीसाधनमाथि कारबाही गर्दा एक करोड १५ लाख ३० हजार रुपैयाँ राजस्व संकलन गरेको छ। कार्यालयको वार्षिक प्रगति विवरणअनुसार गत आर्थिक वर्ष २०८२/८३ मा जिल्लाभर विभिन्न प्रकारका १३ हजार ५५१ सवारीसाधन कारबाहीमा परेका छन्। ती कारबाहीबाट एक करोड १५ लाख ३० हजार रुपैयाँ राजस्व संकलन भएको हो। सबैभन्दा धेरै ४ हजार ६१४ मोटरसाइकल चालक कारबाहीमा परेका छन्।
आर्थिक वर्षको तथ्यांक हेर्दा जेठ महिनामा सबैभन्दा धेरै कारबाही गरिएको छ। जेठ महिनामा मात्रै १ हजार ५०२ सवारीसाधनका चालक कारबाहीमा परेका छन्। त्यसबाट १२ लाख २७ हजार रुपैयाँ राजस्व संकलन भएको कार्यालयले जनाएको छ। तथ्यांकले ट्राफिक कारबाहीसँगै राजस्व संकलनमा पनि घट्दो प्रवृत्ति देखाएको छ। आर्थिक वर्ष २०८१/८२ मा १९ हजार २८९ सवारीसाधनका चालक कारबाहीमा परेका थिए भने त्यसबाट १ करोड ४१ लाख ५३ हजार ५०० रुपैयाँ राजस्व संकलन भएको थियो। यस वर्ष भने कारबाहीमा परेका सवारीसाधन चालकको संख्या र त्यसबाट उठेको राजस्व दुवै घटेका छन्।
