मदान पुरस्कार गुठीले संवत् २०८२ का लागि १० उत्कृष्ट कृतिहरूको श्रेष्ठ सूची सार्वजनिक गरेको छ। प्राप्त २९८ पुस्तकहरूमध्ये केशवराज ज्ञवाली, केशव दाहाल, ललित विष्ट लगायतका लेखकका १० कृतिहरू छनोटमा परेका छन्। गुठीका अनुसार, वि.सं. २०७५ सालदेखि मदन पुरस्कारको राशि चार लाख रुपैयाँ कायम गरिएको छ। ४ साउन, काठमाडौं।
सोमबार सार्वजनिक गरिएको प्रेस विज्ञप्तिअनुसार, यस वर्ष मदन पुरस्कारका लागि गुठीमा प्राप्त २९८ पुस्तकमध्ये मूल्याङ्कनपछि १० कृति श्रेष्ठ सूचीमा छनोट भएका छन्। यीमध्ये एक कृतिलाई मदन पुरस्कार–२०८२ प्रदान गरिनेछ। छनोट भएका कृतिहरूमा केशवराज ज्ञवालीको “अज्ञात”, केशव दाहालको “इथा”, ललित विष्टको “उत्कर्ष”, रोशनकुमार झाको “नेपालमण्डलसँग जोडिएको सिम्रौनगढको इतिहास”, वीणा जोशी (राजभण्डारी) को “नेवार समुदायका परम्परागत मुकुन्डोनाच”, उमा सुवेदीको “परिधि”, सीमा आभासको “महायुग”, श्रवण मुकारुङको “सलह”, डा. नवराज केसीको “स्वस्पर्श” तथा नदीशको “हिउँद” रहेका छन्।
मदन पुरस्कार गुठीका अध्यक्ष कुन्द दीक्षितद्वारा जारी विज्ञप्तिअनुसार, वि.सं. २०७२ देखि गुठीमा प्राप्त पुस्तकहरूमध्ये बढीमा १० वटा कृति छनोट गरी श्रेष्ठ सूची सार्वजनिक गर्ने अभ्यास रहँदै आएको छ। गुठीको नियमानुसार अप्रकाशित सामग्रीको अधिकताका आधारमा पुस्तकलाई छनोटको एक आधार मानिन्छ। वि.सं. २०१२ मा स्थापित मदन पुरस्कार गुठीले पहिलो पटक २०१३ सालमा गद्य, सामाजिक शास्त्र र विज्ञान विधाका तीन कृतिलाई मदन पुरस्कार प्रदान गरेको थियो। त्यसयता पुरस्कार नेपाली भाषामा प्रकाशित उत्कृष्ट कृतिलाई प्रदान गरिँदै आएको छ।
