नेपाल कजाखस्तानसँग ३-२ को सेटले पराजित, काभा पुरुष भलिबल च्याम्पियनसिपमा प्रतिस्पर्धात्मक प्रदर्शन
पाकिस्तानको इस्लामावादमा जारी काभा पुरुष भलिबल च्याम्पियनसिपमा नेपाल कजाखस्तानसँग ३-२ को सेट अन्तरले पराजित भएको छ। तुलनात्मक रुपमा बलियो टोली कजाखस्तानसँग नेपालले कडा प्रतिस्पर्धा गरेपनि पाँच सेटको रोमाञ्चक खेलमा हार व्यहोरेको हो। कजाखस्तानले नेपाललाई २५-१९, २५-२१, ३२-३४, १९-२५ र १५-९ को सेटमा हराएको छ।
सुरुवाती दुई सेटमा पछि परेको नेपालले तेस्रो सेटमा भने कडा मुकाबिला देखाएको थियो। नेपालले १७-१७ र १८-१८ मा बराबरी गर्दै २४-२२ को अग्रता बनाएको थियो। तर कजाखस्तानले टाइमआउट लिएर स्कोर बराबरी गर्यो। नेपालले सेट प्वाइन्टको अवसर पाएपनि सदुपयोग गर्न सकेन। कजाखस्तानले पनि सेट प्वाइन्टको अवसर सदुपयोग गर्न नसक्दा स्कोर ३२-३२ मा पुग्यो। नेपालले लगातार दुई अंक जोड्दै तेस्रो सेट टाईब्रेकमा ३४-३२ ले आफ्नो पक्षमा लगायो।
चौथो सेटमा पनि नेपालले सुरुमै अग्रता बनाउँदै २५-१९ को सेट जितेर खेल बराबरी २-२ मा पुर्यायो। पाँचौं र निर्णायक सेटमा कजाखस्तानले १५-९ को फराकिलो जीत हासिल गर्यो। यस खेलमा नेपालले १ अंक जोड्न सफल भएको छ। काभा च्याम्पियनसिपमा कुल ६ राष्ट्रको सहभागिता छ। आज उज्बेकिस्तान र बंगलादेश तथा पाकिस्तान र श्रीलंका बीच पनि खेल हुनेछ।
