एमालेले संविधान संशोधनका लागि प्राप्त सुझावहरूका आधारमा प्रस्ताव तयार गर्ने निर्णय
समाचार सारांश नेकपा एमालेले संविधान संशोधनका लागि प्राप्त सुझावहरूको आधारमा प्रस्ताव तयार गर्ने निर्णय गरेको छ। पार्टीको उपसमितिले संघीय लोकतान्त्रिक गणतन्त्र र शासन प्रणालीलाई सुदृढ बनाउन आवश्यक सुझाव संकलन सुरु गरेको छ। अग्निप्रसाद खरेलको संयोजकत्वमा बसेको बैठकले तथ्य, तर्क र औचित्यका आधारमा संविधान संशोधनको प्रस्ताव तयार गर्ने सहमति गरेको छ। ६ साउन, काठमाडौं।
नेकपा एमालेले संविधान संशोधनका लागि प्राप्त सुझावका आधारमा प्रस्ताव तयार गर्ने निर्णय गरेको छ। एमालेले संविधान संशोधन सुझाव कार्यदल गठन गरी यसमा काम गरिरहेको छ। संविधान पुनरावलोकन सम्बन्धी प्रस्ताव तयार गर्न तथा संविधान संशोधन सुझाव संकलनका लागि गठित उपसमितिको बैठक बुधबार पार्टी केन्द्रीय कार्यालय च्यासलमा बसेको थियो। उपसमितिका संयोजक अग्निप्रसाद खरेलको अध्यक्षतामा भएको बैठकले संविधान संशोधनका लागि प्राप्त सुझावहरूको आधारमा प्रस्ताव तयार गर्ने निर्णय गरेको हो।
संविधान संशोधन सुझाव कार्यदलका सदस्य सचिव महेश बर्तौलाले यसबारे जानकारी दिएका छन्। उनका अनुसार बुधबार ‘‘संविधान संशोधनका लागि प्राप्त सुझावहरूलाई विषयगत रूपमा वर्गीकरण गरी तथ्य, तर्क र औचित्यका आधारमा प्रस्ताव तयार गर्ने विषयमा छलफल भएको’’ हो। बैठकमा संविधान कार्यान्वयनको हालसम्मको अनुभव, उपलब्धि तथा देखिएका व्यावहारिक चुनौतीहरूको समीक्षा गर्ने विषयमा पनि छलफल भएको छ।
संविधान संशोधनका लागि आवश्यक देखिएका विषयहरूको पहिचान गरी राजनीतिक, संवैधानिक, प्रशासनिक तथा कानुनी दृष्टिकोणबाट अध्ययन गर्ने विषयमा छलफल भएको बर्तौलाले बताए। उनका अनुसार राजनीतिक दल, संवैधानिक निकाय, विषयगत विज्ञ, कानुन व्यवसायी, प्रशासनिक क्षेत्र, नागरिक समाज तथा सरोकारवालाबाट सुझाव संकलन गर्ने विधि र प्रक्रिया सम्बन्धमा पनि छलफल भएको छ। बुधबारको छलफलमा उपसमितिका संयोजक खरेल, सदस्य सचिव बर्तौलासहित रमेश बडाल, टिकराम भट्टराई, राजेन्द्र घिमिरे, अमर थापा र विज्ञको रूपमा पूर्वकानुन मन्त्री माधवप्रसाद पौडेल उपस्थित थिए। सदस्य सचिव बर्तौलाका अनुसार संघीय लोकतान्त्रिक गणतन्त्र र बर्तमान संविधानले अवलम्बन गरेको शासन प्रणालीलाई सुदृढीकरण गर्नका लागि संविधान संशोधन सुझाव संकलन गर्ने काम भइरहेको छ।
