नबिल बैंकले आफ्नो ४२ औँ वार्षिकोत्सवको अवसरमा बैंकिङमा एआई युगको शुरुवात गरेको घोषणा गर्दै सेवामा आर्टिफिसियल इन्टेलिजेन्सको प्रयोग बढाएको छ। अध्यक्ष निर्वाण चौधरीले भने, एआई कर्मचारीहरूको विकल्प नभई सहयोगी प्रविधि हो र यसले ग्राहकलाई छिटो तथा पारदर्शी बैंकिङ सेवा दिन मद्दत गर्दछ। बैंकले एनबैंक एपमार्फत नेपाल–भारत सीमापार रेमिट्यान्स, डिजिटल लाउञ्ज र स्वचालित ऋण प्रक्रिया जस्ता प्रविधिमैत्री सेवा सञ्चालन गरेर आफ्नो डिजिटल रूपान्तरणलाई मजबुत बनाएको छ। ६ साउन, काठमाडौं।
केही वर्षअघि बैंकबाट ऋण लिनु धैर्यताको परीक्षा लिनुपर्ने जस्तो हुन्थ्यो। थोरै कर्जा लिनका लागि समेत बैंक शाखामा पुगेर लामो प्रक्रिया पूरा गर्नुपर्ने हुन्थ्यो। आज भने, त्यही प्रक्रियाका लागि न त शाखा जानुपर्छ न नै धेरै समय लाग्छ। मोबाइलमा केही क्लिक मात्र गरेपछि ऋण खातामा आइपुग्छ। यसका लागि नबिल बैंकले सेवामा अपनाएको एआई अर्थात् आर्टिफिसियल इन्टेलिजेन्सले महत्वपूर्ण भूमिका खेलिरहेको छ।
बैंकका अध्यक्ष निर्वाण चौधरीले नबिल बैंक एआई युगमा प्रवेश गरेको घोषणा गर्दै भने, “एआई केवल सामान्य प्रविधि मात्र नभई निर्णय प्रक्रिया, जोखिम व्यवस्थापन, व्यवसाय सञ्चालन र ग्राहकको वित्तीय अनुभवलाई पुनः परिभाषित गर्ने माध्यम हो।” बैंकले वर्ष २०८३ देखि आफ्नो उद्देश्य, लक्ष्य र मूल्याङ्कन पुनः परिभाषित गर्दै ‘नेपालको सबैभन्दा विश्वसनीय, भरपर्दो र भविष्यप्रति तयार बैंक’ बन्ने लक्ष्य सार्वजनिक गरेको छ।
नबिल बैंकले २०२३ नोभेम्बरदेखि सुरु गरेको सेल्फ–सर्भिस किओस्कले पनि ग्राहकलाई ठूलो सुविधा दिएको छ। यस प्रणालीमार्फत ग्राहकले शाखामा कर्मचारीको प्रत्यक्ष सहयोगविनै विभिन्न बैंकिङ सेवा लिन सक्छन्। बैंकले डिजिटल बैंकिङलाई अझ विस्तार गर्दै नेपाल–भारत–नेपाल सीमापार पर्सन–टु–पर्सन रेमिट्यान्स सेवा सुरु गरेको छ। यसबाट नेपाल र भारतबीच सुरक्षित डिजिटल माध्यमबाट तत्काल रकम पठाउन र प्राप्त गर्न सकिनेछ।
