सरकारले देशभरका जग्गाको प्रयोजनअनुसार सरकारी मूल्य तोकेको छ भने मालपोत कार्यालयले चालु आर्थिक वर्षका लागि मूल्य १० प्रतिशतसम्म वृद्धि गरेका छन्। काठमाडौंको डिल्लीबजार मालपोत कार्यालयले केशरमहल र न्यूरोड वरपरको जग्गाको मूल्य प्रतिआना ७६ लाख ६० हजार रुपैयाँ कायम गरेको छ। भक्तपुर जिल्लाका मालपोत कार्यालयहरूले भने गत आर्थिक वर्षको तुलनामा जग्गाको मूल्याङ्कनमा कुनै परिवर्तन नगरेको जनाएका छन्। ६ साउन, काठमाडौं।
सरकारले देशभरका जग्गाको प्रयोजन अनुसार सरकारी मूल्य तोकेको छ। सम्बन्धित मालपोत कार्यालयहरूले चालु आर्थिक वर्षका लागि १० प्रतिशतसम्म मूल्य वृद्धि गरी सरकारी मूल्य निर्धारण गरेका छन्। काठमाडौं डिल्लीबजार मालपोत कार्यालयले गत आर्थिक वर्षको तुलनामा मूल्याङ्कनमा १० प्रतिशतले वृद्धि गरेको जनाएको छ। उक्त मूल्याङ्कन अनुसार केशरमहल, जमल, ठमेल, न्यूरोड, माइतीघर वरपरका जग्गाको सरकारी मूल्य प्रतिआना ७६ लाख ६० हजार रुपैयाँ कायम गरिएको छ।
डिल्लीबजार मालपोत कार्यालयले न्यूनतम ११ लाख रुपैयाँ प्रतिआना तोकेको छ। सरकारको मूल्य प्रतिआना ७६ लाख २० हजार तोकिएका अन्य स्थानहरूमा रत्नपार्क, पुरानो बसपार्क, सहिद गेटलगायत रहेका छन्। पुतली सडक आसपासका जग्गाको मूल्य प्रतिआना ५६ लाख रुपैयाँ तोकिएको डिल्लीबजार मालपोत कार्यालयले जनाएको छ। यसअघि यो मूल्य ५३ लाख २४ हजार प्रतिआना थियो। यस क्षेत्रमा कच्ची र गोरेटो बाटोले छोएको जग्गाको मूल्य २२ लाखदेखि ३७ लाख रुपैयाँसम्म तोकिएको छ।
यद्यपि मालपोत कार्यालयले गरेको मूल्यभन्दा व्यावहारिक खरिद बिक्रीमा फरक देखिन्छ। चाबहिल मालपोत कार्यालयले हेर्ने क्षेत्रहरूमा गौशलादेखि धोबीखोलासम्मको चक्रपथसँग जोडिएका जग्गाको मूल्य सबैभन्दा बढी कायम भएको छ। उक्त क्षेत्रमा जग्गाको मूल्य प्रतिआना ६२ लाख ७० हजार रुपैयाँ कायम गरिएको छ। गत आर्थिक वर्षमा यस क्षेत्रका जग्गाको मूल्य ५७ लाख रुपैयाँ थियो। बल्खुदेखि बनस्थलीका चक्रपथसँग जोडिएका क्षेत्रको प्रतिआना मूल्य ४७ लाख रुपैयाँ तोकिएकोमा चालु आर्थिक वर्षमा ४९ लाख ३५ हजार रुपैयाँ कायम गरिएको छ।
