जुन महिनाको रेकर्डतहको गर्मीका कारण बेलायतको अर्थतन्त्रले १ अरब १५ करोड पाउन्ड बराबरको क्षति व्यहोरेको नयाँ अध्ययनले देखाएको छ। अध्ययनले अत्यधिक गर्मीले करिब २४ करोड कार्यघण्टा गुमाएको र विशेषगरी निर्माण तथा कृषि क्षेत्रका कामदारहरू सबैभन्दा बढी प्रभावमा परेका बताएका छन्। ग्रान्थम रिसर्च इन्स्टिच्युटकी निर्देशक एलिजाबेथ रोबिन्सनले सरकारले जलवायु परिवर्तन अनुकूलनका लागि तत्काल प्रभावकारी कदम चाल्न आग्रह गरेकी छिन्।
जुन महिनाको रेकर्डस्तरको गर्मीको लहरले बेलायतमा करिब २४ करोड कार्यघण्टा गुम्दा अर्थतन्त्रलाई १ अरब १५ करोड पाउन्ड (करीब १ अरब ५० करोड अमेरिकी डलर) बराबरको नोक्सानी भएको नयाँ अध्ययनले देखाएको छ। अत्यधिक गर्मीले विशेषगरी बाहिरि वातावरणमा शारीरिक श्रम गर्ने कामदारलाई सबैभन्दा बढी असर पुर्याएको अनुसन्धानले पुष्टि गरेको छ। लण्डन स्कूल अफ इकनोमिक्स (एलएसई)को ग्रान्थम रिसर्च इन्स्टिच्युट र युरो–मेडिटेरेनियन सेन्टर अन क्लाइमेट चेन्ज (सीएमसीसी) बाट जारी गरिएको अध्ययन अनुसार निर्माण र कृषि क्षेत्रमा काम गर्ने कामदारहरूले अत्यधिक गर्मीका कारण काम गर्ने समय उल्लेखनीय रूपमा घटाएका थिए।
तुलनात्मकरूपमा कम शारीरिक श्रम हुने पेसामा कार्यरत व्यक्तिहरूमा यस्ता प्रभाव कम देखिएका छन्। अध्ययनअनुसार जुन २२–२८ को सातामा कामदारहरूले औसतमा ०.४७ घण्टा कम काम गरेका थिए। त्यस्तै, ३.६ प्रतिशत जनप्रतिशत अर्थात् करिब १२ लाख ५० हजार कामदार अत्यधिक गर्मीका कारण त्यस हप्तामा काममा उपस्थित हुन सकेनन्। अनुसन्धानकर्ताहरूले काम गर्ने समय, निद्राको गुणस्तर र कार्यस्थलसम्म पुग्दा गर्मीले पारेको असर पनि अध्ययनमा समेटेका थिए।
गत जुनमा बेलायतसहित फ्रान्स तथा अन्य युरोपेली देशहरूले पनि असाधारण गर्मीको सामना गरेका थिए। यस अवधिमा यातायात सेवा, विद्यालय र अस्पतालहरूको नियमित सञ्चालन प्रभावित भएको थियो भने अत्यधिक गर्मीसँग जुध्न पूर्वाधार पर्याप्त नहुनुको चिन्ता समेत व्यक्त गरिएको थियो। ग्रान्थम रिसर्च इन्स्टिच्युटकी निर्देशक एलिजाबेथ रोबिन्सनले उक्त अध्ययनले बेलायत परिवर्तनशील जलवायुसँग पर्याप्त रूपमा अनुकूल हुन नसकेको स्पष्ट पारेको उल्लेख गरेकी छन्। उनले सरकारले चरम गर्मी जोखिमलाई बेवास्ता गर्न नहुने भन्दै तत्काल प्रभावकारी तयारी र अनुकूलनका उपाय अघि बढाउन जोड दिइन्।
