वैभव सूर्यवंशी बने टी-२० अन्तर्राष्ट्रियमा अर्धशतक बनाउने विश्वकै सबैभन्दा कान्छा खेलाडी
भारतका १५ वर्षका ब्याट्सम्यान वैभव सूर्यवंशीले जिम्बाबेविरुद्ध १८ बलमै अर्धशतक प्रहार गरेर पुरुष टी–२० अन्तर्राष्ट्रिय क्रिकेटमा नयाँ विश्व कीर्तिमान कायम गरेका छन्। सूर्यवंशी १५ वर्ष ११८ दिनको उमेरमा अर्धशतक बनाउन सफल भएर टी–२० अन्तर्राष्ट्रियमा सबैभन्दा कान्छा खेलाडी भएका छन्। श्रेयस अय्यरको कप्तानीमा रहेको भारतीय टोलीले १२६ रनको लक्ष्य सजिलै पुरा गर्दै जिम्बाबेविरुद्ध पहिलो टी–२० खेल जितेको छ। ७ साउन, काठमाडौं।
भारतका युवा ब्याट्सम्यान वैभव सूर्यवंशीले टी–२० अन्तर्राष्ट्रिय क्रिकेटमा नयाँ विश्व कीर्तिमान स्थापित गरेका छन्। जिम्बाबेविरुद्धको पहिलो टी–२० अन्तर्राष्ट्रिय खेलमा अर्धशतक प्रहार गर्दै उनी पुरुष टी–२० अन्तर्राष्ट्रिय क्रिकेटमा अर्धशतक बनाउने सबैभन्दा कान्छा खेलाडी बने। हरारेस्थित मैदानमा भएको खेलमा १५ वर्ष ११८ दिनका सूर्यवंशीले मात्र १८ बलमा आफ्नो पहिलो टी–२० अन्तर्राष्ट्रिय अर्धशतक पूरा गरे। उनले चार चौका र चार छक्का प्रहार गरे। भारतले १२६ रनको लक्ष्य ६ ओभरभन्दा बढी समय बाँकी रहँदै सहज रूपमा पूरा गर्यो।
यसअघि यो कीर्तिमान गिब्राल्टरका लुइस ब्रुसको नाममा थियो, जसले सन् २०२१ मा माल्टाविरुद्ध १६ वर्ष ५६ दिनको उमेरमा अर्धशतक बनाएका थिए। सूर्यवंशीले गत महिना आयरल्यान्ड र इङ्ल्याण्डविरुद्धको शृंखलाका लागि पहिलोपटक भारतीय टी–२० टोलीमा स्थान पाएका थिए। इङ्ल्याण्डविरुद्धको पहिलो तीन खेलमा उनले क्रमशः १४, १३ र १५ रन मात्र बनाउन सके। तर जिम्बाबेविरुद्ध उनले पहिलो बलदेखि आक्रमक खेल शैली अपनाउँदै ऐतिहासिक इनिङ्स खेले।
भारतीय बलरहरूले जिम्बाबेलाई २० ओभरमा ७ विकेट गुमाएर १२५ रनमै सीमित गरेपछि सूर्यवंशीको आक्रमक ब्याटिङले भारतलाई सहज जीत दिलायो। सूर्यवंशीले यही हरारे मैदानमा जनवरीमा सम्पन्न भएको आईसीसी यू–१९ विश्वकपको फाइनलमा पनि ८० बलमा १७५ रनको विस्फोटक इनिङ्स खेलेका थिए। यो जितसँगै श्रेयस अय्यरको कप्तानीमा भारतले पहिलो टी–२० अन्तर्राष्ट्रिय जित पनि हात पारेको छ। भारत र जिम्बाबे बीच दोस्रो टी–२० अन्तर्राष्ट्रिय खेल २५ जुलाईमा हरारेमै हुनेछ।
