महानायक राजेश हमाल नेपाल भलिबल लिगको फ्रेन्चाइज टोली कर्णाली शिवराजका ब्रान्ड एम्बासडर नियुक्त भएका छन्। कर्णाली शिवराजले कामना विष्ट र प्रगति नाथलाई कर्णालीकी क्विन तथा सुमित्रा रेग्मीलाई कर्णालीकी ग्लोरी घोषित गरेको छ। एमएमए फाइटर रविन्द्र ढाँटलाई कर्णालीको फेस अफ घोषणा गर्दै टोलीले आफ्नाे आधिकारिक एन्थम सार्वजनिक गरेको छ। ९ साउन, काठमाडौं।
नेपाली चलचित्रका महानायक राजेश हमाल नेपाल भलिबल लिग (एनभीएल) का फ्रेन्चाइज टोली कर्णाली शिवराजका ब्रान्ड एम्बासडर नियुक्त भएका छन्। शुक्रबार आयोजित विशेष कार्यक्रममा कर्णाली शिवराजले हमाललाई औपचारिक रूपमा ब्रान्ड एम्बासडर घोषणा गरेको हो। सोहि अवसरमा टोलीले फेस अफ कर्णाली, क्विन अफ कर्णाली, ग्लोरी अफ कर्णाली तथा आफ्नो आधिकारिक एन्थम ‘आयो आयो कर्णाली शिवराज’ पनि सार्वजनिक गरेको छ।
कर्णाली क्षेत्रका राष्ट्रिय टोलीका खेलाडी कामना विष्ट र प्रगति नाथलाई क्विन अफ कर्णालीको उपाधि प्रदान गरिएको छ। त्यस्तै, दुई पटक महिला फ्रेन्चाइज टोलीको उपाधि जिताउने कप्तान सुमित्रा रेग्मीलाई ग्लोरी अफ कर्णाली घोषित गरिएको छ। एमएमए फाइटर रविन्द्र ढाँटलाई फेस अफ कर्णालीको रूपमा घोषणा गरिएको छ। उनी रोड टु यूएफसी सिजन-५ को तयारीका लागि इन्डोनेसियामा रहेका कारण कार्यक्रममा उपस्थित हुन सक्नुभएन। उनी भिडियो सन्देशमार्फत टोलीलाई शुभकामना दिएका थिए।
