योर्गेन क्लोपलाई जर्मनी राष्ट्रिय फुटबल टोलीको मुख्य प्रशिक्षकको रूपमा नियुक्त गरिएको छ। क्लोपले सन् २०३० सम्म सम्झौता गरेका छन् र उनको पहिलो खेल सेप्टेम्बर २४ मा नेदरल्यान्ड्सविरुद्ध हुनेछ। क्लोपले भने, ‘यदि मेरो परिवारलाई दुःख हुने कुनै काम भयो भने म आफैं यो पदबाट सरेको छु।’ ८ साउन, काठमाडौं।
प्रिमियर लिग क्लब लिभरपुल छोडेको दुई वर्षपछि क्लोप प्रशिक्षणमा पुनः फर्किँदै सन् २०३० को फिफा विश्वकपसम्मको सम्झौता गरेका हुन्। ५९ वर्षीय क्लोपले शुक्रबार औपचारिक रूपमा जिम्मेवारी सम्हाल्दै जर्मनीलाई थप सशक्त टोली बनाउने लक्ष्य व्यक्त गरे। उनले जर्मन सञ्चारमाध्यमलाई परिवारको गोपनीयता कायम राख्न पनि कडा चेतावनी दिएका छन्।
क्लोपले पूर्व प्रशिक्षक जुलियन नागेल्समानमाथि भएको अत्यधिक मिडिया आलोचना र दबाबको कुरा उल्लेख गर्दै यस्तो अवस्था आफू सहने छैन भनेका छन्। केही दिनअघि सम्पन्न फिफा विश्वकपमा जर्मनी राउन्ड अफ ३२ मा बाहिरिएपछि नागेल्समानले राजिनामा दिएका थिए। क्लोपले भने, ‘म राम्रो पारिश्रमिक पाउँछु। यदि भोलि असफल भएँ भने म आफैं हट्नेछु। जर्मन फुटबल संघ (डीएफबी) ले सम्झौता अन्त्य गर्ने निर्णय गरे पनि म स्वीकार गर्छु। तर यदि मेरो परिवारलाई दुःख पुर्याइयो भने म आफैं पदबाट सरेको छु।’
उनको नेतृत्वमा जर्मनीले सेप्टेम्बर २४ मा युइएफए नेसन्स लिग अन्तर्गत नेदरल्यान्ड्सविरुद्ध पहिलो खेल खेल्नेछ। क्लोपले सन् २०२४ मा लिभरपुल छोड्दा आफू ‘ऊर्जाहीन’ भएको बताएका थिए। उनले लिभरपुलमा नौ वर्ष अवधिमा प्रिमियर लिग, च्याम्पियन्स लिग, एफए कप, दुई लिग कप र क्लब विश्वकपसहित कुल छ उपाधि जितेका थिए। लिभरपुलपछि उनले केही समय विश्राम लिएर रेड बुल समूहको ग्लोबल फुटबल प्रमुखको जिम्मेवारी सम्हालेका थिए।
क्लोपसहित उनका पुराना सहायक प्रशिक्षक पेप लिजेन्डर्स र पिटर क्राभिट्ज पनि जर्मनीको प्रशिक्षण टोलीमा रहनेछन्। पूर्व जर्मन अन्तर्राष्ट्रिय स्वेन बेन्डर पनि प्रशिक्षक समूहमै रहेका छन्। साथै, आन्द्रेयास रेटिगको स्थानमा पूर्व जर्मन डिफेन्डर पेर मर्टेसाकर आगामी जनवरीदेखि जर्मनीको खेल निर्देशक हुनेछन्।
सम्बन्धित खबर
