रोल्पाको परिवर्तन गाउँपालिकामा शिक्षक सरुवाको विरोधमा विद्यार्थी र अभिभावकहरूले गाउँपालिकाको कार्यालयमा ताला लगाएका छन्। विद्यालय व्यवस्थापन समितिका अध्यक्ष वीरेन्द्र घर्ती मगरका अनुसार प्रधानाध्यापक कृष्णराम डाँगीलाई अन्यत्र सरुवा गरेपछि प्रदर्शनकारीहरूले विरोध जनाएका छन्। प्रदर्शनकारीले शिक्षकको पुनर्बहालीसहित विद्यार्थीको पढाइ सुनिश्चित गर्न प्लेकार्डसहित गाउँपालिका कार्यालयमा नाराबाजी गरेका छन्। ८ साउन, रोल्पा।
रोल्पाको परिवर्तन गाउँपालिकामा विद्यार्थी र अभिभावकहरूले ताला लगाएका छन्। परिवर्तन गाउँपालिका-५ पुतलाचौरस्थित त्रिवेणी आधारभूत विद्यालयमा अध्ययनरत विद्यार्थी र अभिभावकहरूले शुक्रबार गाउँपालिकाको कार्यालयमा ताला लगाएको विद्यालय व्यवस्थापन समितिका अध्यक्ष वीरेन्द्र घर्ती मगरले जानकारी दिए। शिक्षक सरुवा गरिएको विरोधमा उनीहरूले नाराबाजी गर्दै कार्यालयमा तालाबन्दी गरेका छन्। “विद्यार्थी-अभिभावकहरूको माग पूरा गर, विद्यार्थीको पढाइ सुनिश्चित गर, शिक्षकको पुनर्बहाली गर” जस्ता प्लेकार्ड बोकेर उनीहरू गाउँपालिकाको कार्यालय पुगेका थिए।
गाउँपालिकाले सो विद्यालयका प्रधानाध्यापक समेत रहेका शिक्षक कृष्णराम डाँगीलाई नेपाल राष्ट्रिय माविमा काज फिर्ता गरेको थियो। डाँगी त्रिवेणी आधारभूत विद्यालयमा २०७६ सालदेखि काजमा कार्यरत थिए। त्रिवेणी आधारभूत विद्यालयलाई गाउँपालिकाले ९ वैशाख २०८३ देखि कक्षा १० सञ्चालन गर्न अनुमति दिएको थियो। परिवर्तन गाउँपालिका अध्यक्ष सुकबहादुर बुढामगर बिरामी भएका कारण काठमाडौं उपचारका लागि गएका छन्। प्रमुख प्रशासकीय अधिकृत निमबहादुर केसी र प्रशासन शाखा प्रमुख ललितकुमार बुढा पनि बिदामा रहेका छन्।
