नेपाली क्रिकेट टोलीका तीव्र गतिका बलर नन्दन यादव ह्यामस्ट्रिङ चोटका कारण नेदरल्यान्ड्समा जारी लिग २ शृङ्खलाबाट बाहिरिएका छन्। नेपाल क्रिकेट सङ्घ (क्यान)का अनुसार, चोटका कारण नन्दनले नामिबियाविरुद्धको पहिलो खेलमा बलिङ गर्न असहज महसुस गरेका थिए।
१० साउन, काठमाडौं। नन्दनको स्थानमा रिजर्भ खेलाडी हेमन्त धामीले टोलीमा सहभागी हुने सम्भावना प्रबल देखिएको छ। नामिबियासँगको पहिलो खेलमा ह्यामस्ट्रिङ समस्याका कारण नन्दनले पहिलो ओभरदेखि नै बलिङ गर्दा असहज महसुस गरेका थिए र फिजियोले पनि उनलाई केही सहायता गरिरहेका थिए। त्यसपछि उनी दोस्रो खेलमा पनि खेल्न सकेका थिएनन्।
उनको स्थानमा बाँयाहाते स्पिनर ललित राजवंशीले दोस्रो खेलमा सहभागिता जनाएका थिए। नन्दनको स्थानमा खेल्ने खेलाडीको नाम अझै सार्वजनिक भएको छैन, तर हेमन्त धामीले उनको स्थान लिने सम्भावना प्रबल देखिन्छ। हेमन्तले जर्सीमा भएको अभ्यास खेलमा राम्रो प्रदर्शन गरेका थिए र अहिले टोलीको रिजर्भ खेलाडीका रूपमा छन्।
