इरानविरुद्ध पुनः सुरु भएका अमेरिकी सैन्य कारबाहीमा जुलाई महिनायता चार जना अमेरिकी सैनिकको मृत्यु भएका छन् भने २०७ जना घाइते भएका छन्। पेन्टागनले जुलाई सात गतेदेखि इरानसँगको शत्रुतापूर्ण कारबाहीको नयाँ चरण सुरु भएको जनाएको छ र यसलाई विशेष श्रेणीमा राखेको छ। अमेरिकाले स्ट्रेट अफ हर्मुजमा व्यापारिक पानीजहाजमाथि इरानले आक्रमण गरी युद्धविराम सम्झौता उल्लङ्घन गरेको आरोप लगाएको छ।
संयुक्त राज्य अमेरिकाको रक्षा मन्त्रालय (पेन्टागन) को अनुसार, जुलाईमा इरानविरुद्ध पुनः सैन्य कारबाही सुरु भएयता चार अमेरिकी सैनिकको मृत्यु भएको र २०७ जना घाइते भएको छ। पेन्टागनले आइतबार अद्यावधिक गरेको ‘डिफेन्स क्याजुअल्टी एनालाइसिस सिस्टम’ अनुसार जुलाई २५ सम्म इरानविरुद्ध सञ्चालन गरिएको अमेरिकी सैन्य अभियान ‘एपिक फ्युरी’मा १४ अमेरिकी सैनिकको मृत्यु र ४१७ जना घाइते भएका छन्।
पेन्टागनले हालै उक्त तथ्याङ्क प्रणालीमा ‘ओभरसिज अपरेसन्स’ नामक नयाँ श्रेणी थपेको छ। यस अन्तर्गत जुलाई ७ यताको अमेरिकी सैनिक हताहतीलाई छुट्टै राखिएको छ, जसअनुसार चार सैनिकको मृत्यु र २०७ जना घाइते भएका छन्। यद्यपि नयाँ श्रेणीमा मृतक सैनिकको नाम मात्र समावेश गरिएको छ; मृत्यु वा घाइते हुने समय, स्थान र कारणबारे विस्तृत विवरण भने उल्लेख गरिएको छैन।
इरानसँगको द्वन्द्वको नयाँ चरणमा चार सैनिकको मृत्यु भएको पुष्टि भए पनि घाइते रहेका सबै सैनिकहरू इरानसँगको द्वन्द्वसंग सम्बन्धित छन् वा छैनन् भन्ने विषयमा पेन्टागनले कुनै स्पष्टता दिएको छैन। अमेरिकी कानुन अनुसार कङ्ग्रेसको अनुमति बिना राष्ट्रपतिले सामान्यतया अमेरिकी सेनालाई ६० दिनभन्दा लामो समयसम्म शत्रुतापूर्ण कारबाहीमा संलग्न गराउन पाउँदैनन्। सञ्चारमाध्यमका अनुसार ट्रम्प प्रशासनले जुलाई १० मा कङ्ग्रेसलाई पठाएको पत्रमा जुलाई ७ मा ‘स्ट्रेट अफ हर्मुज’मा तीन व्यापारिक पानीजहाजमाथि इरानले गरेको आक्रमणले पूर्वको युद्धविराम सम्झौता उल्लङ्घन गरेको जनाइएको थियो। यसै आधारमा ह्वाइट हाउसले जुलाई ७ लाई इरानसँगको शत्रुतापूर्ण कारबाहीको नयाँ चरणको प्रारम्भ मिति भनेर परिभाषित गरेको छ।
