आठ महिनापछि अन्तरिक्ष टोली सुरक्षित रूपमा पृथ्वीमा फर्कियो

अन्तर्राष्ट्रिय अन्तरिक्ष स्टेशनमा आठ महिना बिताएपछि अमेरिकी–रूसी संयुक्त टोली आइतबार कजाकस्तानमा सुरक्षित रुपमा अवतरण गर्न सफल भएको छ। तीन सदस्यीय टोलीले सोयुज एमएस–२८ यानमार्फत २४१ दिन लामो वैज्ञानिक तथा प्राविधिक मिशन पूरा गरेको हो। राजनीतिक तनावका बाबजुद अमेरिका र रूसले अन्तरिक्षमा सहकार्य जारी राखेका छन्।

नासाका अन्तरिक्ष यात्री क्रिस विलियम्स, रुसका अन्तरिक्ष यात्री सर्गेई कुड–स्वेर्चकोभ र सर्गेई मिकेभ सवार सोयुज एमएस–२८ यान प्यारासुटमार्फत जेजकाजगनको दक्षिणपश्चिमी क्षेत्रमा सुरक्षित अवतरण भएको छ। यो मिशन विलियम्स र मिकेभका लागि पहिलो अन्तरिक्ष यात्रा हो भने कुड–स्वेर्चकोभका लागि दोस्रो अन्तरिक्ष यात्रा हुन आएको छ।

अवतरणपछि चालक दल हेलिकप्टरमार्फत कारागान्डा लागिने योजना रहेको छ। नासाका विलियम्स त्यहाँबाट अमेरिका फर्केर ह्युस्टनस्थित जोन्सन स्पेस सेन्टर जानेछन् भने रुसी अन्तरिक्ष यात्री कुड–स्वेर्चकोभ र मिकेभ मस्को नजिकैको स्टार सिटीस्थित प्रशिक्षण केन्द्रमा फर्कने छन्।

यसअघि, सन् २०२२ मा युक्रेन युद्ध सुरु भएपनि दुवै देशबीच राजनीतिक तनावका बाबजुद अन्तरिक्ष कार्यक्रमअन्तर्गत संयुक्त अभियान निरन्तर जारी छ। जुलाई १४ मा नासाका अन्तरिक्ष यात्री अनिल मेनन र रोस्कोसमोसका अन्तरिक्ष यात्री प्योत्र डुब्रोभ र अन्ना किकिनाको नेतृत्वमा नयाँ टोली कजाकस्तानस्थित बैकोनुर कोस्मोड्रोमबाट प्रक्षेपण भई अन्तर्राष्ट्रिय अन्तरिक्ष स्टेशन पुग्न सफल भएको थियो।