दक्षिण पश्चिमी जापानको क्युशु टापुमा मंगलबार ७.१ म्याग्निच्युडको शक्तिशाली भूकम्प आएपछि जापान मौसम विज्ञान विभागले सुनामीको चेतावनी जारी गरेको छ। विभागले एक मिटरसम्म अग्ला सुनामी छालहरू आउन सक्ने बताउँदै साँझ ५ः०० बजेसम्म सतर्क रहन सम्बन्धित क्षेत्रका बासिन्दालाई आव्हान गरेको छ।
विश्वको सबैभन्दा भूकम्पीय सक्रिय देश जापानमा सन् २०११ को विनाशकारी भूकम्पको सम्झना दिलाउने गरी हालैका दिनहरूमा ठूला भूकम्पको जोखिम बढेको छ। जापानको क्युशु टापुमा आएको कम्पन जापानको आफ्नै “शिन्डो स्केल”अनुसार मापन गरिएको विभागले जनाएको छ। सुनामी एक मिटरसम्म मापन गर्न सकिने र साँझ ५ः०० बजेसम्म आइ पुग्न सक्ने अनुमान गरिएको छ।
जापानी मिडिया एन एच केले निर्धारित स्तरसम्मका छालहरू पहिले नै रेकर्ड भइसकेको हुन सक्ने उल्लेख गरेको छ। यसअघि जून २५ मा उत्तरी जापानमा ७.२ म्याग्निच्युडको भूकम्प आए पनि कुनै व्यक्ति मृत्यु नभएको र ठूलो क्षति नपुगेको जनाइएको थियो।
प्रशान्त महासागरको “रिंग अफ फायर“ को पश्चिमी किनारमा अवस्थित चार प्रमुख टेक्टोनिक प्लेटहरूको शीर्षमा बसेको जापान विश्वका सबैभन्दा भूकम्पीय रूपमा सक्रिय देशहरू मध्ये एक हो। लगभग १२ करोड ५० लाख मानिसको आवास रहेको उक्त द्वीपसमूहमा वार्षिक सयौं भूकम्पीय झट्का अनुभव गरिन्छ र विश्वमा हुने भूकम्पको लगभग १८ प्रतिशत यही क्षेत्रमा हुने बताइएको छ।
