भारतीय राष्ट्रिय क्रिकेट टोलीका सहायक प्रशिक्षक रायन टेन डोशाटेले आफ्नो जिम्मेवारीबाट राजीनामा दिएका छन्। इंग्ल्यान्डविरुद्धको शृङ्खला सकिएपछि उनले बीसीसीआईलाई आफ्नो निर्णयबारे जानकारी गराएका छन्। अब उनी पुनः इन्डियन प्रिमियर लिग टोली कोलकाता नाइट राइडर्सको प्रशिक्षक समूहमा आबद्ध हुनेछन्। १२ साउन, काठमाडौं।
टेन डोशाटेले इंग्ल्यान्ड भ्रमणको क्रममा भारतीय क्रिकेट नियन्त्रण बोर्ड (बीसीसीआई) लाई आफ्नो निर्णयबारे जानकारी गराएका थिए। उक्त भ्रमणमा भारतले टी–२० र एकदिवसीय दुवै शृङ्खला गुमाएको थियो। नेदरल्यान्ड्सका पूर्वकप्तान टेन डोशाटे सन् २०२४ मा राहुल द्रविडको स्थानमा गौतम गम्भीरको मुख्य प्रशिक्षक बनेपछि भारतीय टोलीसँग आबद्ध भएका थिए।
गम्भीरकै रोजाइमा टोलीमा आएका उनले ब्याटिङ र फिल्डिङ दुवै विभागमा सहायक प्रशिक्षकको भूमिका निभाएका थिए। अब उनी इन्डियन प्रिमियर लिग (आईपीएल) टोली कोलकाता नाइट राइडर्स (केकेआर) को प्रशिक्षक समूहमा आबद्ध हुनेछन् र पुनः अभिषेक नायरसँग सहकार्य गर्नेछन्।
टेन डोशाटेको केकेआरसँग लामो सम्बन्ध छ। खेलाडीका रूपमा उनले सन् २०१२ र २०१४ मा केकेआरबाट दुई आईपीएल उपाधि जितेका थिए। त्यसपछि सन् २०२२ मा फिल्डिङ प्रशिक्षकका रूपमा टोलीमा फर्किएका उनी सन् २०२४ सम्म प्रशिक्षक समूहमा रहेका थिए। भारतीय टोलीमा उनको कार्यकालमा भारतले सन् २०२५ को एसिया कप जित्नुका साथै सन् २०२६ को आईसीसी पुरुष टी–२० विश्वकपको उपाधि रक्षा गर्न सफल भयो।
