१२ साउन, सर्लाही । सुनसरी घटनापछि सर्लाहीमा पनि डीजे प्रयोगमा प्रतिबन्ध लगाइएको छ। डीजे बजाउने विषयमा विवाद हुँदा सुनसरी तनावग्रस्त बनेको थियो। यसको प्रभाव तराईका अन्य जिल्लामा पनि देखिएपछि सर्लाही जिल्ला प्रशासनले डीजे बजाउन रोक लगाएको हो। सर्लाही प्रशासनले मंगलबार प्रेस विज्ञप्ति जारी गरेर जिल्लाभर डीजे बजाउन निषेध गरेको जनाएको छ।
सुनसरीको देवागञ्ज गाउँपालिका–३ कप्तानगञ्जमा आइतबार राति डीजे चलाउने विषयमा सुरु भएको विवाद उग्ररूप लिएपछि स्थानीय प्रशासनले गोली चलाउँदा एक जनाको मृत्यु भएको थियो। नौ जना घाइते भएका छन्। सो घटनाको विरोधमा सर्लाहीमा पनि हिजो सोमबार सदरमुकाम मलंगवामा प्रदर्शन गरिएको थियो। सहायक प्रमुख जिल्ला अधिकारी होम प्रसाद घिमिरेले जारी गरेको विज्ञप्तिमा भनिएको छ, ‘कसैले पनि धार्मिक, सांस्कृतिक, सामाजिक वा व्यक्तिगत कार्यक्रममा डीजे बाजा प्रयोग नगर्न पुनः सूचना गरिन्छ।’ ‘यदि कसैले उक्त निर्णयको बेवास्ता गरी डीजे बजाएको पाइएमा सुरक्षा कार्यमा खटिएका सुरक्षाकर्मीले त्यस्ता डीजे, साउण्ड सिस्टम तथा सवारीसाधन नियन्त्रणमा लिई आयोजक र संचालक दुवैलाई प्रचलित कानूनअनुसार कारबाही गरिने छ भन्ने कुरा स्पस्ट जानकारीका लागि अनुरोध गरिन्छ।’
