१३ साउन, काठमाडौं । सभामुख डोलप्रसाद (डीपी) अर्याल र राष्ट्रिय सभाका अध्यक्ष नारायणप्रसाद दाहालबीच सिंहदरबारस्थित सभामुखको कार्यकक्षमा भेटवार्ता भएको छ। यस बैठकमा संसद्को प्रभावकारी सञ्चालनका विषयमा छलफल गरिएको सभामुखको सचिवालयले जनाएको छ। साथै संघीय संसद्का समसामयिक विषयहरू, संसद्को प्रभावकारी सञ्चालन र विधायन प्रक्रियालाई थप सुदृढ बनाउने पक्षमा पनि विचार विमर्श गरिएको छ।
संघीय संसद्को दुई साता लामो बैठक स्थगित गरिएको थियो र स्थगितपश्चात बिहीबारदेखि प्रतिनिधिसभाको बैठक पुनः शुरू हुँदैछ। यसै क्रममा, बुधबार सरकारले विभिन्न ९ वटा विधेयक संघीय संसद्मा पेस गर्न स्वीकृति प्रदान गरेको छ। सरकारका प्रवक्ता सस्मित पोखरेलका अनुसार, संवैधानिक निकायका पदाधिकारीहरूको पारिश्रमिक, सेवा शर्त तथा सुविधासम्बन्धी ऐन २०५३ लाई संशोधन गर्ने विधेयक संसद्मा पेश गरिनेछ।
खानी तथा खनिज पदार्थ सम्बन्धी कानुन संशोधन र एकीकरणका लागि बनेको विधेयक, संक्रामक पशु रोग र नियन्त्रणसम्बन्धी व्यवस्थाका लागि बनेको विधेयक पनि संसद्मा पेश गर्न मन्त्रिपरिषद्ले स्वीकृति ज्ञापन गरेको छ। राहदानी ऐन २०७६ संशोधन गर्ने विधेयक, मानव वेचविखन तथा ओसारपसार नियन्त्रणसम्बन्धी पहिलो संशोधन विधेयक, बालश्रम निषेध तथा नियमनसम्बन्धी विधेयकहरू पनि संसद्मा प्रस्तुत गरिनेछन्। यससँगै आन्तरिक वायुसेवाको दायित्वसम्बन्धी व्यवस्था गर्ने विधेयक, मेलमिलाप ऐन २०६८ संशोधन गर्ने विधेयक र कर्मचारी संशोधन ऐन २०१९ लाई संशोधन गर्ने विधेयकलाई पनि संसद्मा पेश गर्न मन्त्रिपरिषद्ले स्वीकृति दिएको छ।
उक्त पृष्ठभूमिमा सभामुख अर्याल र राष्ट्रिय सभाका अध्यक्ष दाहालबीच भएको यस भेटवार्ताले आगामी संसद् सञ्चालनलाई अझ प्रभावकारी बनाउने दिशामा महत्वपूर्ण पहल गरेको छ।
सम्बन्धित खबर
