नेपालमा घरेलु फुटबल गतिविधि ठप्प भएपछि नेपाली खेलाडीहरू भुटानको फुटबल लिगमा व्यावसायिक अवसर खोज्न बाध्य भएका छन्। रश्मी कुमारी घिसिङ र गीता राना लगायतका धेरै नेपाली महिला खेलाडीहरू अहिले भुटानी क्लबबाट नियमित रूपमा लिग खेलिरहेका छन्। नेपाली डिफेन्डर अनन्त तामाङ र मिडफिल्डर एरिक विष्ट आउँदो सिजनका लागि बंगलादेशको फोर्टिस एफसी लिमिटेडमा अनुबन्ध भएका छन्। १५ साउन, काठमाडौं। अखिल नेपाल फुटबल संघ (एन्फा) फिफाको निलम्बनमा परेपछि नेपालको फुटबल गतिविधि अहिले शून्य छ। यसअघि नै लामो समयदेखि शीर्ष श्रेणीको शहीद स्मारक ए डिभिजन लिग हुन सकेको थिएन। एन्फाले गत वर्ष बल्लतल्ल सुरु गरेको राष्ट्रिय लिग पनि पर्यटन भिसामा रहेको विदेशी खेलाडी खेलाएपछि स्थगित भएको थियो।
नेपालको घरेलु फुटबल शून्य बनेपछि फुटबल खेलाडीदेखि रेफ्री प्रशिक्षकहरू सबै बेरोजगार भएका छन्। तर केही नेपाली खेलाडीहरू भुटानको लिग खेल्न व्यस्त छन्। भुटानको फुटबलले प्रगति गरेको छ र नेपाली खेलाडीको गन्तव्य विगत केही वर्षयता भुटान बनेको छ। भुटानी लिगमा खेल्ने पुरुष खेलाडीको तुलनामा महिला खेलाडीको संख्या बढी छ। नेपाली राष्ट्रिय टिमका रश्मी कुमारी घिसिङ र गीता राना भर्खरै ट्रान्सपोर्ट युनाइटेड लेडिज टिममा अनुबन्ध भएका छन्। यसअघि नै नेपालका दीपा शाही, समिक्षा घिमिरे, अनिता केसी र मिना देउबा ट्रान्सपोर्ट युनाइटेडबाट भुटानको महिला राष्ट्रिय लिगमा खेलिरहेका छन्।
भुटानको लिग खासै चर्चित र ठूलो नभए पनि त्यहाँ नियमित रूपमा लिग चलिरहेको छ। स्थानिय खेलाडीदेखि विदेशी खेलाडीहरूले त्यहाँ गएर खेलिरहेका छन्। एकै टिममा धेरै विदेशी खेलाडीले खेल्न पाउने भएकाले नेपाली खेलाडीहरूले पनि भुटानमा अवसर पाइरहेका छन्। भाषा, संस्कृति र भौगोलिक निकटताका कारण पनि नेपाली खेलाडीका लागि भुटान सहज गन्तव्य बनेको छ। फुटबल खेल्नुका साथै आर्थिक रूपमा पनि आर्जन हुने भएकाले नेपाली खेलाडीका लागि यो राम्रो अवसर बनेको छ।
सम्बन्धित खबर
