स्पेनको सेउटामा ४० हजार बढी आप्रवासीको प्रवेश, ८४ हजार जनसंख्याको सहरमा ठूलो दबाव

स्पेनको सेउटा शहरमा केही दिनदेखि ४० हजारभन्दा बढी अनियमित रूपमा आप्रवासी प्रवेश हुँदा गम्भीर मानवीय संकट उत्पन्न भएको छ। मोरक्कोबाट समुद्र पार गरेर सेउटा पुग्ने क्रममा कम्तीमा १९ जनाको मृत्यु भएको पुष्टि भएको छ भने उद्धार कार्य जारी छ। स्पेनका प्रधानमन्त्री पेद्रो सान्चेजले आप्रवासी व्यवस्थापन र सीमा सुरक्षाका विषयमा जानकारी लिन शुक्रबार सेउटा भ्रमण गरेका छन्।

स्पेनी दैनिक एल पाइसका अनुसार सुरक्षासँग सम्बन्धित प्रारम्भिक अनुमानअनुसार पछिल्ला केही दिनमा ४० हजारभन्दा बढी आप्रवासी अनियमित रूपमा सेउटा प्रवेश गरिसकेको देखिएको छ। केही सुरक्षास्रोतले यो संख्या ५० हजार नजिक पुग्न सक्ने अनुमान गरेका छन्। यद्यपि, स्पेनको गृह मन्त्रालयले अहिलेसम्म आधिकारिक तथ्याङ्क सार्वजनिक गरेको छैन। यदि यो अनुमान सत्य हो भने, करिब ८४ हजार जनसंख्या रहेको सेउटामा केही दिनमै झण्डै आधाभन्दा बढी नयाँ मानिसको आगमन भएको हुन्छ।

सेउटाको अस्थायी आप्रवासी केन्द्रको क्षमता धेरैअघि नै नाघिसकेको छ। करिब पाँच सय जना मात्र सम्हाल्न सक्षम यो केन्द्र बाहिर सयौं युवा रातभर पालोमा पर्खिरहेका थिए। आश्रय नपाएकाहरू पार्क, समुद्र किनार र सार्वजनिक स्थलमै सुतेका छन्। कतिपयले खाजा किन्ने प्रयासमा सिक्का जम्मा गरिरहेका छन् भने केहीले स्पेनी मुख्यभूमिकातर्फ जाने फेरी चढ्ने आशामा बन्दरगाहतर्फ लागेका छन्।

एल पाइसका अनुसार मोरक्कोबाट पौडी खेल्दै सेउटा पुग्ने क्रममा कम्तीमा १९ जनाको मृत्यु पुष्टि भएको छ। प्रहरीले उद्धार टोली अझै खोजी कार्यमा रहेको बताएको छ, जसले मृतक संख्या वृद्धि हुन सक्ने संकेत गर्दछ। समुद्र पार गरेर जीवन बचाएका मानिसहरूको यात्रा पनि सहज छैन। उनीहरूलाई अस्थायी आश्रय, स्वास्थ्य परीक्षण, खाना, पानी र कानुनी प्रक्रिया व्यवस्थापन गर्नु अहिले स्पेनी प्रशासनको सबैभन्दा ठूलो चुनौती बनेको छ।