स्कट एडवार्ड्सले नेदरल्यान्ड्स क्रिकेट टोलीको कप्तानीबाट राजीनामा, बास डे लिडे नयाँ कप्तान नियुक्त

नेदरल्यान्ड्स क्रिकेट टोलीका कप्तान स्कट एडवार्ड्सले चार वर्षपछि आफ्नो कप्तानी पदबाट राजीनामा दिएका छन्। नेदरल्यान्ड्स क्रिकेट संघले २६ वर्षीय अलराउन्डर बास डे लिडेलाई टोलीको नयाँ कप्तान नियुक्त गरेको छ। एडवार्ड्सको नेतृत्वमा नेदरल्यान्ड्सले दक्षिण अफ्रिका र वेस्ट इन्डिजजस्ता शक्तिशाली टोलीमाथि ऐतिहासिक जित हासिल गरेको थियो।

एडवार्ड्सले शनिबार ड्रेसिङ रुममा आफू कप्तानबाट हट्ने निर्णय सुनाएका थिए। उनले जुन २०२२ मा पिटर सिलारको स्थानमा कप्तानी सम्हालेका थिए। उनको नेतृत्वमा नेदरल्यान्ड्सले लगातार चार आईसीसी विश्वकप प्रतियोगितामा भाग लिएको छ र दक्षिण अफ्रिका, वेस्ट इन्डिज र बंगलादेशजस्ता टोलीमाथि ऐतिहासिक जित दिलाएको छ।

एडवार्ड्सले भने, “म खेलाडीको रूपमा अझै लामो समय योगदान दिन सक्छु भन्ने लाग्छ, हाललाई कप्तानी भने छाड्ने निर्णय गरेको छ। म मेरो टिमलाई सधैंको साथका लागि धन्यवाद दिन चाहन्छु।” अब कप्तानीको जिम्मेवारी बास डे लिडेले सम्हाल्नेछन्। उनले हालसम्म अन्तर्राष्ट्रिय एकदिवसीय र टी–२० क्रिकेटमा करिब दुई हजार तीन सय रन बनाएका छन् र करिब ९० विकेट पनि लिएका छन्।