वैज्ञानिकहरूले दुई वर्षको उमेरभित्र कम चिनी सेवनले दशकौंपछि मस्तिष्कको स्वास्थ्यमा सुधारको संकेत गरेका छन्। ब्रिटेनमा चिनी खरीदमा लगाइएको प्रतिबन्ध फुकुवा भएपछि मानिसहरूले आफ्नो भोजनमा चिनीको मात्रा तीव्र रूपमा बढाएको विषयमा सो अनुसन्धानले अध्ययन गरेको छ। अनुसन्धानको नतिजाले चिनी कोटा प्रणाली लागु भएको अवधिमा बालबालिकामा डिमेन्सियाको जोखिम २३ प्रतिशतले घटेको देखाएको छ। यो अध्ययनले पूर्ण नतिजा दिन सकेको छैन, तर विज्ञहरूले मस्तिष्कका लागि स्वस्थ आहार उपयुक्त हुने बताएका छन्।
हाम्रो भविष्यको स्वास्थ्यका लागि पहिलो १,००० दिन अत्यन्त महत्वपूर्ण हुने संकेत गरेको यो पहिलो अध्ययन होइन। ब्रिटेनले दोस्रो विश्वयुद्धपछि देशलाई पुरानै अवस्थामा फर्काउन लागाएको विभिन्न ‘प्राकृतिक प्रयोग’ र खाद्य कोटा प्रणाली अन्त्य गर्ने निर्णयबारे विभिन्न अध्ययनहरू गरेका छन्। चिनी खरिदमा लगाइएको रासन प्रणाली सन् १९५३ को सेप्टेम्बरमा अन्त्य गरिएको थियो। त्यसपछि औसतमा दैनिक ४१ ग्राम (१० क्यूब) रहेको चिनीको खपत तत्काळ बढेर ८० ग्राम (२० क्यूब) पुगेको थियो।
पछिल्लो अध्ययनमा करिब ६५ हजार व्यक्तिहरूले यूकेको बायोब्याङ्क प्रोजेक्टमा भाग लिएका थिए। हङकङ युनिभर्सिटी अफ साइन्स एन्ड टेक्नोलोजीका विश्लेषकहरूले चिनी कोटा प्रणाली अपनाइएको अवधिले बालबालिकामा पार्ने प्रभावको विश्लेषण गरेका थिए। दुई वर्षको उमेरसम्म चिनी सेवन सीमित गरिएको बालबालिकामा २३ प्रतिशत कम डिमेन्सिया र अढाई वर्षसम्म रोग पत्ता लगिन कम भएको तर्क गरिएको छ। “हाम्रो अध्ययनले जीवनको प्रारम्भिक चरणमा चिनीको मात्रा कम राख्दा मस्तिष्कको स्वास्थ्यमा दीर्घकालीन सुधार आउने संकेत गरेको छ,” अनुसन्धानकर्ता जीआझेन झेङले बताए।
न्युरोलोजी जर्नलमा उक्त अनुसन्धानको निष्कर्ष प्रकाशित भएको छ। तर उनीहरूले यो प्रभाव खासगरी चिनी कारण हो कि होइन भन्ने थप अनुसन्धान आवश्यक रहेको बताए। स्वतन्त्र र गैरनाफामुखी चिकित्सा अनुसन्धान सञ्जाल कोक्रेनकी प्रमाण उत्पादन तथा अनुसन्धान विधि विभाग प्रमुख रेचल रिचर्डसन भन्छिन्, “उनीहरू सही दिशामा हुन सक्छन्।” “यस अध्ययनले महत्त्वपूर्ण संकेत दिएको हुन सक्छ,” रिचर्डसनले भनिन्। “तर बाल्यकालमा चिनी सेवन र डिमेन्सियाको जोखिम बीच प्रत्यक्ष सम्बन्धको अन्तिम प्रमाणका रूपमा यसलाई लिन सकिँदैन।”
