१६ साउन, काठमाडौं । अमेरिकी राष्ट्रपति डोनाल्ड ट्रम्पको पहलमा तयार गरिएको शान्ति योजनाअनुसार हमासले केही सर्तसहित हतियार बिसाउन तयार भएको छ। यस कदमलाई पाकिस्तानले स्वागत गरेको छ। पाकिस्तानका प्रधानमन्त्री शहबाज शरीफले सामाजिक सञ्जाल एक्समा यस कदमलाई स्वागत गर्दै लेखेका छन्, ‘पाकिस्तान गाजा शान्ति योजनाअन्तर्गत हतियार छाड्ने प्रक्रिया लागु गर्ने दिशामा बोर्ड अफ पिसअन्तर्गत भएको प्रगतिको स्वागत गर्दछ।’
प्रधानमन्त्री शरीफले अमेरिका, इजिप्ट, कतार र टर्कीसहितका मध्यस्थकर्ताहरूले यो प्रगति हासिल गर्न गरेका प्रयासहरूको विशेष प्रशंसा गरेका छन्। उनले भने, ‘राष्ट्रपति ट्रम्पको साहसी नेतृत्वमा यो बोर्ड अफ पिसका लागि एउटा महत्त्वपूर्ण उपलब्धि हो।’ शहबाज शरीफले यी प्रयासहरूले अन्तर्राष्ट्रिय नियम र संयुक्त राष्ट्रसंघका प्रस्ताव अनुसार निश्चित समयमै प्रक्रिया अघि बढ्ने आशा व्यक्त गरेका छन्।
उनले थपे, ‘यस प्रक्रियामार्फत १९६७ भन्दा अघिको सीमाहरूको आधारमा एक स्वतन्त्र र सार्वभौम प्यालेस्टिनी राष्ट्रको स्थापना हुनुपर्छ। यस राष्ट्रको राजधानी अल–कुद्स अल–सरिफ (जेरुसुलेम) हुनुपर्छ।’ यसबाहेक, अमेरिकी राष्ट्रपति डोनाल्ड ट्रम्पले आफ्नो ‘बोर्ड अफ पिस’ ले गाजामा हमास र अन्य सशस्त्र समूहहरूसँग सम्झौता गरेको जानकारी दिएका छन्। उक्त सम्झौताअनुसार उनीहरू हतियार बिसाउन तयार भएका छन्। हमासका एक वरिष्ठ अधिकारीले गाजामा पूर्ण रूपमा हतियार बिसाउने ‘बोर्ड अफ पिस’ को प्रस्तावमा संगठन सहमत भएको कुरा बताएका छन्।
सम्बन्धित खबर
