माइक्रोसफ्टले रुस समर्थित ह्याकरहरूले होटल र सार्वजनिक वाइफाइ प्रयोगकर्तालाई निशाना बनाइरहेका कारण विशेष सावधानी अपनाउन निर्देशन दिएको छ। ह्याकरहरूले सार्वजनिक वाइफाइको लगइन पोर्टलमा नक्कली विन्डोज वा सफ्टवेयर अपडेटको सन्देश देखाएर प्रयोगकर्ताको उपकरणमा भाइरस फैलाइरहेका छन्। प्रयोगकर्तालाई सार्वजनिक वाइफाइको सट्टा आफ्नै मोबाइल हटस्पट प्रयोग गर्न र शंकास्पद पप-अप सन्देश वा फाइल डाउनलोड नगर्न माइक्रोसफ्टले अनुरोध गरेको छ। १९ साउन, काठमाडौं। माइक्रोसफ्टका थ्रेट इन्टेलिजन्स विभागका अनुसार, यो आक्रमणमा ‘स्टोर्म-२९४५’ नामक ह्याकिङ समूह सक्रिय रहेको छ। ह्याकरहरूले होटेल, विमानस्थल वा सम्मेलन स्थलका वाइफाइ लगइनमा देखिने ‘क्याप्टिभ पोर्टल’ को दुरुपयोग गर्दै छन्। वाइफाइमा जडान गर्ने प्रयास गर्ने प्रयोगकर्ताहरुलाई नक्कली सफ्टवेयर अपडेट वा सुरक्षा फाइल डाउनलोड गर्ने सन्देश देखाइन्छ। यस्ता फाइल वा अपडेटमा क्लिक गरेपछि डिभाइसमा भाइरस प्रवेश गर्छ। भाइरसले डिभाइसमा प्रवेश गरेपछि ह्याकरहरूले ब्राउजर कुकिज, पासवर्डहरू र महत्त्वपूर्ण कागजातहरू चोरी गर्छन्। माइक्रोसफ्टले यस्तो ह्याकर आक्रमणबाट जोगिन प्रयोगकर्तालाई होटल, विमानस्थल वा सार्वजनिक वाइफाइ प्रयोग गर्ने सट्टा आफ्नो मोबाइल हटस्पट वा प्राइवेट नेटवर्क प्रयोग गर्न सुझाएको छ।
