बंगलादेशमा शेख हसिनाको सरकारी आवासमा ‘जुलाई जनविद्रोह स्मारक संग्रहालय’ उद्घाटन

बंगलादेशको ढाकामा पूर्वप्रधानमन्त्री शेख हसिनाको सरकारी आवास गणभवनलाई ‘जुलाई जनविद्रोह स्मारक संग्रहालय’को रूपमा उद्घाटन गरिएको छ। सन् २०२४ को जुलाई–अगस्ट महिनामा भएको छात्र आन्दोलनमा मारिएका नागरिकहरुको सम्झनामा अन्तरिम सरकारले यो संग्रहालय स्थापना गरेको हो। संयुक्त राष्ट्रको प्रतिवेदन अनुसार उक्त आन्दोलनका क्रममा सुरक्षा बलले अत्यधिक बल प्रयोग गर्दा १४ सय भन्दा बढी नागरिकको मृत्यु भएको थियो।

बुधबार ‘गणभवन’मा ‘जुलाई जनविद्रोह स्मारक संग्रहालय’को औपचारिक उद्घाटन गरिएको छ। जुलाई–अगस्ट २०२४ को छात्र आन्दोलनका दौरान निधन भएका नागरिकहरुको सम्मानमा यो संग्रहालय बनाइएको हो। समाचार एजेन्सी पीटीआईका अनुसार प्रधानमन्त्री तारिक रहमानले राजधानी ढाकाको शेर–ए–बांग्ला नगरस्थित गणभवनमा संग्रहालयको उद्घाटन गरेका हुन्। उक्त कार्यक्रम ५ अगस्टमै आयोजना गरिएको थियो।

सन् २०२४ मा आजकै दिन शेख हसिनाले देश छाडेर भारत गएकी थिइन्। संयुक्त राष्ट्र मानवाधिकार कार्यालयको फेब्रुअरी २०२५ को प्रतिवेदन अनुसार १५ जुलाईदेखि १५ अगस्ट २०२४ सम्मको छात्र आन्दोलन (जुलाई जनविद्रोह)का समयमा १४ सय नागरिकको मृत्यु भएको थियो। प्रतिवेदनमा हसिनाको सरकारले प्रदर्शनकारी विरुद्ध सुरक्षा बलकाबीच असाध्यै बल प्रयोग गरेको उल्लेख गरिएको छ। सरकारी रोजगारीमा आरक्षण व्यवस्थालाई लिएर सुरु भएको विरोध प्रदर्शनपछि शेख हसिनाले ५ अगस्ट २०२४ मा देश त्याग्नु परेको थियो। त्यसको तीन दिनपछि मोहम्मद युनुसले अन्तरिम सरकारका मुख्य सल्लाहकारको रूपमा काम थालिरहेका थिए। संग्रहालय स्थापना र गणभवन संरक्षण गर्ने प्रक्रिया युनुस नेतृत्वको अन्तरिम सरकारले सुरु गरेको थियो।