जापानको हिरोशिमा शहरले आणविक बम आक्रमणको ८१औं वार्षिक स्मृति दिवस मनाउँदै विश्व समुदायलाई आणविक हतियारका खतराहरूबारे पुनः चेतावनी प्रदान गरेको छ। मेयर काजुमी मात्सुईले आणविक हतियारलाई सुरक्षा उपायको रूपमा लिने प्रवृत्तिले विश्वलाई विनाशतर्फ डोर्याउन सक्ने चेतावनी दिएका छन्। प्रधानमन्त्री साने ताकाइचीले जापानले आणविक हतियारको प्रयोग कहिल्यै नहुने विश्व निर्माणका लागि यथार्थपरक दृष्टिकोण अपनाउने प्रतिबद्धता व्यक्त गरेका छन्।
२१ साउन, टोकियो (रासस/एपी) । हिरोशिमामा आयोजित समारोहमा करिब ५० हजार मानिसको उपस्थिती रहेको थियो। अमेरिका, इरान लगायत लगभग १२० देश र क्षेत्रका प्रतिनिधिहरू पनि सो कार्यक्रममा सहभागी थिए। सन् १९४५ मा अमेरिकी बी–२९ बमवर्षक विमानले हिरोशिमामा आणविक बम खसाल्ने समय बिहान ८:१५ बजे एक मिनेट मौन धारण गरी शान्तिको प्रतीक स्वरूप घण्टी बजाइएको थियो।
समारोहमा प्रस्तुत शान्ति घोषणामा मेयर मात्सुईले विश्वका कतिपय राजनीतिक नेताहरू अझै पनि आणविक हतियारलाई यथार्थपरक सुरक्षा अवधारणाको रूपमा स्वीकार गरिरहेको उल्लेख गर्दै, यस्तो सोचले हिंसालाई वैधता दिने र आणविक हतियारविहीन विश्वको लक्ष्यलाई टाढा धकेल्ने बताए। उनले विगतका पीडादायी अनुभवबाट शिक्षा लिन र शान्ति स्थापनाका लागि विश्वबासीहरूलाई सक्रिय भूमिका निर्वाह गर्न आह्वान गरे।
प्रधानमन्त्री साने ताकाइचीले आफ्नो प्रधानमन्त्री पदको पहिलो स्मृति समारोहमा सहभागी हुँदै संयुक्त राष्ट्रसंघको आणविक अप्रसार सन्धिको ढाँचाभित्र रहेर आणविक हतियारको प्रयोग कहिल्यै नहुने विश्वको निमार्णका लागि जापानले यथार्थपरक दृष्टिकोण अपनाउने बताए। उनले जापानले युद्धपछिको तीन गैर–आणविक सिद्धान्तहरू कायम राखेको पनि उल्लेख गरे। तथापि, भविष्यमा ती नीतिहरूको स्वरूपबारे देशभित्र बहस जारी रहेको जानकारी दिए।
