समाचार सारांश अमेरिकी क्रिकेटर हर्मीत सिंहलाई जनकपुर बोڵ्ट्सले नेपाल प्रिमियर लिगको तेस्रो संस्करणका लागि कप्तान नियुक्त गरेको छ। बायाँ हातका स्पिन अलराउन्डर हर्मीतले पहिलेका दुई संस्करण सुदूरपश्चिम रोयल्सबाट खेलेर टोलीलाई फाइनलसम्म पुर्याउन महत्वपूर्ण योगदान दिएका थिए। जनकपुर बोڵ्ट्सका मुख्य कार्यकारी अधिकृत निरोज खतिवडाले टोलीको नेतृत्व हर्मीतलाई नयाँ ऊर्जा र प्रतिबद्धतासहित सुम्पिएको बताउँदै उनीसँग ठूलो अपेक्षा रहेको बताए। २३ साउन, काठमाडौं। अमेरिकी क्रिकेटर हर्मीत सिंहले नेपाल प्रिमियर लिग (एनपीएल) को तेस्रो संस्करणमा कप्तानको रूपमा जनकपुर बोڵ्ट्ससँग अनुबन्ध गरेका छन्। जनकपुरले शनिबार सामाजिक सञ्जालमार्फत उनीसँग अनुबन्ध भएको जानकारी गराउँदै कप्तानी पनि घोषणा गरेको छ। बायाँ हातका स्पिन बलिङ अलराउन्डर हर्मीतले एनपीएलका पहिलो दुई संस्करणमा सुदूरपश्चिम रोयल्सबाट खेलेका थिए। उनले दुवै संस्करणमा सुदूरपश्चिमलाई फाइनलसम्म पुर्याउन महत्वपूर्ण भूमिका निभाएका थिए। पहिलो संस्करणमा उनले पाँच खेलमा २८ रन बनाउँदै आठ विकेट लिए। दोस्रो संस्करणमा भने उनी १६६ भन्दा बढी स्ट्राइक रेटमा नौ खेलमा १३३ रन बनाएका थिए। बलिङमा ६.१८ इकनोमीमा १२ विकेट लिए। भारतीय टोलीबाट २०१२ को यू-१९ विश्वकप जितिसकेका हर्मीत अहिले अमेरिकी राष्ट्रिय टोलीबाट खेलिरहेका छन्। उनले २९ टी-२० अन्तर्राष्ट्रिय खेलमा ३१ विकेट लिएका छन् र २४२ रन बनाएका छन्। जनकपुरले पहिलो संस्करणमा अनिल साहको कप्तानीमा एनपीएलको उपाधि जितेको थियो। दोस्रो संस्करणमा अनिल साहसँगै दक्षिण अफ्रिकाका वायन पार्नेल र नामिबियाका जान निकोल लोफ्टी-इटनले टोलीको नेतृत्व गरेका थे। जनकपुरका मुख्य कार्यकारी निरोज खतिवडाले नयाँ ऊर्जा, सोच र संकल्पसहित अगाडि बढ्न हर्मीतलाई कप्तानी जिम्मेवारी दिइएको बताएका छन्। “हरेक सफल टोलीको आधार मात्र उत्कृष्ट खेलाडी होइन, सशक्त नेतृत्व पनि हो। नयाँ सिजनसँगै जनकपुर बोڵ्ट्स नयाँ ऊर्जा, नयाँ सोच र नयाँ संकल्पका साथ अघि बढ्ने तयारीमा छ। त्यस यात्राको नेतृत्व गर्ने जिम्मेवारी हामीले हर्मीतलाई सुम्पेका छौं,” उनले भने।
सम्बन्धित खबर
