ईस्पोर्ट्स विश्वकप २०२६ अन्तर्गत पब्जी मोबाइल विश्वकपको समूह ‘बी’ मा आजदेखि नेपालको होरा ईस्पोर्ट्सले प्रतिस्पर्धा सुरु गर्दैछ। समूह चरणको शीर्ष पाँचमा रहने टोलीले सिधै ग्रान्ड फाइनलमा स्थान बनाउनेछन् भने छैटौँदेखि १३औं स्थानसम्म रहने टोलीले सर्भाइभल स्टेज खेल्ने अवसर पाउनेछ। होरा ईस्पोर्ट्सले प्रतियोगिताको अन्तिम चरणमा स्थान बनाउने लक्ष्यसहित आज र भोलि हुने समूह ‘बी’ का खेलहरूमा उत्कृष्ट प्रदर्शन गर्ने तयारी गरेको छ।
८ साउन, काठमाडौं। ईस्पोर्ट्स विश्वकप २०२६ अन्तर्गत पब्जी मोबाइल विश्वकपमा नेपालको होरा ईस्पोर्ट्सले आजदेखि समूह ‘बी’ मा प्रतिस्पर्धा गर्दैछ। समूह ‘बी’ का खेलहरू अगस्ट ८ र ९ मा सञ्चालन हुनेछन्। यस समूहमा होरा लगायत १६ टोली छन्। समूह चरणको शीर्ष पाँच टोलीले सिधै ग्रान्ड फाइनलमा स्थान बनाउनेछन् भने छैटौँदेखि १३औं स्थानमा रहेका टोलीहरुले सर्भाइभल स्टेज खेल्नेछन्। अन्तिम तीन स्थानमा पर्ने टोली प्रतियोगिताबाट बाहिरिनेछन्।
सर्भाइभल स्टेजमा दुवै समूहबाट छैटौँदेखि १३औं स्थानमा रहेका गरी जम्मा १६ टोलीले प्रतिस्पर्धा गर्नेछन्। तीमध्ये शीर्ष ६ टोलीले ग्रान्ड फाइनलमा स्थान बनाउँछन्। यसरी समूह चरणबाट सिधै फाइनल पुग्ने १० टोली र सर्भाइभल स्टेजबाट छनौट हुने ६ टोली गरी जम्मा १६ टोलीले ग्रान्ड फाइनलमा प्रतिस्पर्धा गर्नेछन्। समूह ‘ए’ का खेलहरू अगस्ट ६ र ७ मा सम्पन्न भइसकेका छन्। समूह ‘ए’ बाट पाकिस्तानको फोर थ्राइव समेत पाँच टोलीले सिधै ग्रान्ड फाइनलमा स्थान बनाएका छन्।
फोर थ्राइवसँगै भारतको ओरानगुटान, मंगोलियाको अउरोरा, भियतनाम/सिंगापुरको टिम फ्ल्याश, र मिडल इस्टको निग्मा ग्यालक्सी शीर्ष पाँचमा रहेर फाइनलमा पुगेका छन्। समूह ‘ए’ बाट फाइनलमा पुगेका पाँचमध्ये चार टोली एसियाली क्षेत्रका हुन्। अब समूह ‘बी’ मा होरा ईस्पोर्ट्सले पनि उत्कृष्ट प्रदर्शन गर्दै सिधै ग्रान्ड फाइनलमा स्थान बनाउने प्रयास गर्नेछ। नेपाललाई प्रतिनिधित्व गर्दै आएको होराका लागि आज र भोलिका खेलहरू अत्यन्त महत्वपूर्ण हुनेछन्। समूह चरणको शीर्ष पाँचमा पर्न सफल भएमा उसले सर्भाइभल स्टेज बिना नै प्रतियोगिताको अन्तिम चरणमा स्थान बनाउनेछ। यदि छैटौँदेखि १३औं स्थानसम्म रह्यो भने फाइनल प्रवेशको लागि अर्को चरण पार गर्नुपर्नेछ।
