सन् २०२४ को विद्यार्थी आन्दोलनको बीचमा बाङ्गलादेशकी पूर्व प्रधानमन्त्री शेख हसिनाले देश छोडेर भारतमा शरण लिएका थिए। गत साता उनले दिल्लीबाट भर्चुअल प्रेस कन्फरेन्समार्फत पहिलोपटक सार्वजनिक रूपमा कुरा गरिन्। उक्त कन्फरेन्समा उनले मुख्य रूपमा आफ्नो पार्टी अवामी लीग र बाङ्गलादेश फर्किने योजनाबारे जानकारी गराइन्। उनले आगामी डिसेम्बरसम्म बाङ्गलादेश फर्कने इच्छा व्यक्त गरिन्। भारतमा पत्रकारहरूसँग कुराकानी गर्ने अनुमति पाएको विषयमा बाङ्गलादेश सरकारले कडा असन्तुष्टि प्रकट गरेको समाचार सार्वजनिक भएको छ। यसअघि शेख हसिनाले रोयटर्ससँग दिएको अन्तरवार्तामा स्वदेश फर्कने कुरा घोषणा गरेकी थिइन्।
शेख हसिनाको घर फर्किने घोषणा भारत र बाङ्गलादेशबीच तनावपूर्ण अवस्थामा के सुधार ल्याउनेछ वा स्थिति झन् बिग्रिनेछ? उनको पत्रकार सम्मेलनभन्दा केही दिन अघि बीबीसी न्यूजका शुभज्योति घोषले भारत-बाङ्गलादेश सम्बन्धका जानकार र अवामी लीगका नेताहरूसँग गरेको कुराकानीको आधारमा तयार पारेको विश्लेषणात्मक रिपोर्टमा उल्लेख गरिएको छ कि शेख हसिना विगत दुई वर्षदेखि भारतमा छन्। उनले आगामी डिसेम्बरमा आफ्नो पार्टीका नेता तथा कार्यकर्तासहित बाङ्गलादेश फर्कने र अदालतमा आत्मसमर्पण गर्ने इच्छा सार्वजनिक गरेपछि दुवै देशमा हलचल मच्चिएको छ।
तर, भारतमा विश्लेषकहरूले उनको उक्त अभिव्यक्तिलाई ‘देश फर्किने निश्चित घोषणा’ भन्दा पनि ‘स्थिति परीक्षण’को रूपमा हेरिरहेका छन्। आधिकारिक रूपमा कम्तीमा भारत सरकारको व्यवहारमा शेख हसिनाको बसाइसँग सम्बन्धित कुनै ठोस परिवर्तन देखिएको छैन। हालै भारतको विदेश तथा गृह मन्त्रालयका केही वरिष्ठ अधिकारीहरूले बीबीसीलाई भनेका छन्, “भारतले शेख हसिनालाई निम्तो दिएको छैन, न शरण दिएको छ, न र जबरजस्ती निष्कासन गर्न लागेको छ।” एक वरिष्ठ अधिकारीले थपे, “उनी हालको अवस्था मूल्यांकन गरेर घर फर्किन चाहन्छिन् भने फर्कुन्, यदि भारतमै रहन सहज लाग्छ भने त्यही ठीक होला। यो मामिलामा हामीसँग नयाँ केही बताउने कुरा छैन।”
