काठमाडौंको भृकुटीमण्डपमा जारी ‘नाइमा नेपाल मोबिलिटी एक्स्पो–२०२६’ मा ५५ भन्दा बढी विद्युतीय सवारी ब्रान्डहरू र ४० भन्दा बढी नयाँ मोडलहरू सार्वजनिक भएका छन्। नयाँ विद्युतीय गाडी भित्रिने क्रम बढेसँगै उपभोक्ताले खरिद अघि सर्भिस सेन्टर, स्पेयर पार्ट्स उपलब्धता र दीर्घकालीन मर्मत सेवाबारे स्पष्ट जानकारी लिन आवश्यक छ। एक्स्पो संयोजक गौरव शारडाले ग्राहकलाई गाडी किन्दा आधिकारिक बिक्रेताको सर्भिस नेटवर्क, पार्ट्स उपलब्धता र कम्पनीको जिम्मेवारीबारे पाँचवटा महत्वपूर्ण प्रश्न सोध्न सुझाव दिनुभएको छ। २८ साउन, काठमाडौं।
नेपालमा विद्युतीय सवारीसाधनको बजार विस्तारसँगै नयाँ–नयाँ ब्रान्डका गाडीहरू आइरहेका छन्। आकर्षक डिजाइन, नयाँ प्रविधि, लामो रेन्ज र प्रतिस्पर्धी मूल्यसहित चिनियाँ समेत विभिन्न देशका ब्रान्ड नेपाली बजारमा प्रवेश गरिरहेका छन्। यो अवस्था काठमाडौंको भृकुटीमण्डपमा साउन २६ देखि जारी ‘नाइमा नेपाल मोबिलिटी एक्स्पो–२०२६’ मा पनि देखिन्छ। एक्स्पोमा ५५ भन्दा बढी ब्रान्ड सहभागी छन्। ४० भन्दा बढी नयाँ मोडलहरू सार्वजनिक भएका छन्। चारपांग्रे, दुईपांग्रे र कमर्सियल सवारीमा नयाँ ब्रान्ड थपिने क्रम तीव्र भइरहेको छ।
तर, गाडीका ब्रान्ड र मोडल थपिँदै गर्दा उपभोक्ताले अन्य महत्वपूर्ण प्रश्नहरू सोध्नुपर्ने अवस्था आएको छ। गाडी किनेपछि सर्भिस कहाँ गर्ने? स्पेयर पार्ट्स उपलब्ध हुन्छन् कि हुँदैनन्? ब्याट्री वा मोटरमा समस्या आएमा कसले मर्मत गर्छ? कम्पनी नेपालबाट बाहिरियो भने ग्राहकको अवस्था कसरी हुन्छ? गाडी खरिद गर्दा ग्राहक प्रायः मूल्य, रेन्ज, डिजाइन, फिचर्स र फाइनान्सिङ सुविधामा बढी ध्यान दिन्छन्। तर गाडीको वास्तविक स्वामित्व लागत र दीर्घकालीन विश्वसनीयताको लागि बिक्रीपछिको सेवा पनि उत्तिकै महत्वपूर्ण छ। हाल ग्राहकहरू गाडीको गुणस्तर, सर्भिस र स्पेयर पार्ट्सभन्दा नयाँ मोडललाई प्राथमिकता दिइरहेका छन्।
नयाँ ब्रान्डसँग नयाँ जोखिम नेपालको अटो बजारमा पछिल्ला वर्षहरूमा चिनियाँ विद्युतीय सवारीका ब्रान्डहरूको प्रवेश तीव्र भएको छ। नाइमा एक्स्पो–२०२६ मा बीवाईडी, ओमोडा/जेको, डेन्जा, फोर्थिङ, हेनरी भोल्ट्स, आइकार, केई, लिपमोटर, म्याक्सस, आरफक्स, हेनरी बोमा, वुलिङ, जिकर लगायतका ब्रान्ड सहभागी छन्। यीमध्ये कतिपय ब्रान्डहरू नेपालका लागि नयाँ हुन् भने कतिपयले बजारमा आफ्नो उपस्थिति विस्तार गरिरहेका छन्। नयाँ ब्रान्डहरूको सबैभन्दा ठूलो चुनौती भनेको बिक्रीपछिको सेवा र पार्ट्स आपूर्ति सुनिश्चित गर्नु हो।
काठमाडौंमा आकर्षक शोरुम र केही सर्भिस सेन्टर राखेर मात्र देशभरका ग्राहकलाई दीर्घकालीन सेवा दिन सकिँदैन। विशेष गरी काठमाडौं बाहिर गाडी बिक्री पछि नियमित सर्भिस, दुर्घटना मर्मत, ब्याट्री परीक्षण, मोटर तथा इलेक्ट्रोनिक पार्ट्सको मर्मत र जेन्युइन स्पेयर पार्ट्सको उपलब्धता कस्तो हुन्छ भन्ने प्रश्न महत्त्वपूर्ण छ। काठमाडौं बाहिर सर्भिस सेन्टर कति छन्? स्थापित ब्रान्डहरूले बिक्रीसँगै आफ्नो सर्भिस नेटवर्क विस्तार गरिरहेका छन्।
नयाँ ब्रान्डका गाडी किन्न खोज्ने ग्राहकका लागि एक्स्पो आफैं एउटा अवसर हो। एउटै ठाउँमा धेरै ब्रान्डका प्रतिनिधिहरू भेटिने भएकाले ग्राहकले बिक्री मूल्य र फिचर मात्र नभई, बिक्रीपछिको सेवाबारे प्रश्न गर्न सक्छन्। ग्राहकले कम्तीमा यी पाँच प्रश्नको जवाफ खोज्नुपर्छ: देशभर आधिकारिक सर्भिस सेन्टरहरू कति छन्? काठमाडौं बाहिर कुन–कुन सहरमा सर्भिस सुविधा उपलब्ध छ? आवश्यक जेन्युइन स्पेयर पार्ट्सको स्टक कति छ र आयातमा कति समय लाग्छ? ब्याट्री, मोटर, कन्ट्रोलर वा इन्भर्टर बिग्रिँदा मर्मत सुविधा नेपालमै छ वा पूरै पार्ट्स फेर्नुपर्छ? आयातकर्ता वा उत्पादक कम्पनीले नेपालमा कारोबार बन्द गरे ग्राहकलाई सर्भिस र पार्ट्स उपलब्ध गराउने जिम्मेवारी कसले लिन्छ?
