काठमाडौंको बुढानीलकण्ठ नगरपालिका–८ मा क्रिकेट र चेस प्रशिक्षणका लागि ‘क्रिकेट एरेना एकेडेमी’ को औपचारिक उद्घाटन गरिएको छ। नगर प्रमुख मिठाराम अधिकारीले उद्घाटन गरेको उक्त एकेडेमीले ग्रासरुट तहबाट नयाँ खेलाडी उत्पादन गर्ने लक्ष्य राखेको सञ्चालक रुपक अर्यालले जानकारी दिए। पूर्वराष्ट्रिय क्रिकेटर प्रदीप गुरुङले प्रशिक्षण प्रदान गर्ने यस एकेडेमीमा हाल १० जना खेलाडीले अभ्यास गरिरहेका छन्।
बुढानीलकण्ठ नगरपालिका–८ तल्लो भंगालस्थित ओमनगर समाजमा रहेको यो एकेडेमी करिब साढे ३ रोपनी क्षेत्रफलमा फैलिएको छ। यहाँ क्रिकेट प्रशिक्षणका लागि दुईवटा इन्डोर नेट र खुला क्रिकेट मैदान निर्माण गरिएको छ। मैदानमा स्ट्यान्डर्ड पिच पनि निर्माण गरिएको छ भने सञ्चालक अर्यालका अनुसार एक टोलीमा आठ खेलाडी राखेर खेल्न सकिने व्यवस्था गरिएको छ।
क्रिकेटप्रतिको बढ्दो आकर्षणलाई मध्यनजर गर्दै ग्रासरुट तहबाट नयाँ खेलाडी तयार गर्ने उद्देश्यले यो एकेडेमी स्थापना गरिएको अर्यालले बताए। ‘बालबालिकालाई खेलसँगै मानसिक विकासका लागि क्रिकेट र चेसको प्रभावकारी प्रशिक्षण दिन यो एकेडेमी सञ्चालनमा ल्याएका हौं,’ उनले भने। हाल यहाँ १० जना खेलाडीले प्रशिक्षण लिइरहेका छन् र आगामी दिनमा ४० देखि ५० जनासम्म प्रशिक्षण दिने लक्ष्य राखिएको छ।
प्रवेश खुला गरिएको छ र साताको तीनदेखि छ दिनसम्म प्रशिक्षण लिन सकिने व्यवस्था गरिएको छ। प्रशिक्षणमा भर्ना भएका खेलाडीलाई क्रिकेट ब्याट र टि-शर्ट पनि उपलब्ध गराइनेछ। पूर्वराष्ट्रिय क्रिकेटर प्रदीप गुरुङले यो एकेडेमीमा प्रशिक्षण दिनेछन्। गुरुङ राष्ट्रियस्तरका प्रतियोगितामा सहभागी भइसकेका हुन् र बालुवाटार क्रिकेट क्लबका पूर्वखेलाडी पनि हुन्। एकेडेमीको उद्घाटन गर्दै नगर प्रमुख अधिकारीले क्रिकेट एरेनाको शुरूवात हुनु खुशी र गौरवको विषय भएको उल्लेख गर्दै यसबाट भविष्यमा राष्ट्रियस्तरका खेलाडी उत्पादन हुने विश्वास व्यक्त गरे।
