४ भदौ, काठमाडौं । रुसी सेनाले युक्रेनको राजधानी किएभ र वरिपरिका क्षेत्रमा बिहीबार राति गरेको क्षेप्यास्त्र आक्रमणमा कम्तीमा पाँच जनाको मृत्यु भएको छ। युक्रेनी अधिकारीहरूले जनाएअनुसार आक्रमणमा २३ जनाभन्दा बढी घाइते भएका छन्। युक्रेनको राज्य आपतकालीन सेवा (डीएसएनएस)का अनुसार आक्रमणमा आवासीय भवन र गोदामहरूलाई लक्षित गरिएको थियो। ध्वस्त भवनका भग्नावशेषमा फसेकाको उद्धारका लागि बचावकर्ताहरू परिचालित छन्। उद्धार टोलीले भग्नावशेषबाट एक जनालाई जीवित निकाल्न सफलता पाएको छ।
किएभका मेयर भिताली क्लित्स्कोका अनुसार आक्रमणमा बाल अस्पतालसमेत क्षतिग्रस्त भएको छ। वरिपरिका केही सवारीसाधनहरूमा पनि आगलागी भएको छ। राजधानीको दक्षिण–पश्चिमी क्षेत्रमा पर्ने सोलोमियान्स्की जिल्लास्थित औद्योगिक केन्द्र पनि क्षेप्यास्त्रले प्रहार गरिएको क्लित्स्कोले बताएका छन्। यसैबीच, किएभ क्षेत्रको ब्रोभारी जिल्लामा भएको छुट्टै आक्रमणमा एक जनाको मृत्यु भएको र अर्को एक जना घाइते भएको क्षेत्रीय गभर्नर तिमुर तकाचेन्कोले जानकारी दिएका छन्। आक्रमणअघि क्षेत्रीय प्रशासनले स्थानीय बासिन्दालाई सुरक्षित स्थानमा आश्रय लिन आग्रह गरेको थियो।
युक्रेनी वायुसेनाले यसको सूचना दिँदै रातभरि किएभसहित विभिन्न क्षेत्रमा पटक–पटक क्षेप्यास्त्र आक्रमण सम्बन्धी सूचना जारी गर्यो। रुसी हवाई आक्रमणका कारण किएभ क्षेत्रका हजारौँ घर र संरचनामा विद्युत् आपूर्ति अवरुद्ध भएको छ। क्षतिग्रस्त ऊर्जासम्बन्धी संरचना मर्मत गर्न प्राविधिक टोली परिचालित गरिएको अधिकारीहरूले बताएका छन्। पछिल्ला केही सातादेखि किएभले लगभग प्रत्येक रात रुसी आक्रमणको सामना गरिरहेको छ। केही आक्रमणमा दर्जनौं मानिसहरूको मृत्यु भएको छ भने ठूलो संख्यामा घाइते भएका छन्। यसैबीच युक्रेनले पनि रुसी क्षेत्रमा क्षेप्यास्त्र र ड्रोन आक्रमण तीव्र पारेको छ। यसै साता रुसी भूमिमा भएको दुई पृथक युक्रेनी आक्रमणमा एक बालकसहित कम्तीमा १६ जनाको मृत्यु भएको थियो। रूसले सन् २०२२ फेब्रुअरीमा युक्रेनमाथि सैनिक आक्रमण सुरु गरेको थियो। साढे चार वर्षदेखि जारी यस युद्धमा रूसले युक्रेनको करिब पाँचमध्ये एक भूभाग आफ्नो नियन्त्रणमा राखेको छ, जसको ठूलो हिस्सा पूर्वी सीमावर्ती क्षेत्रमा पर्छ।
