सन्तोषी श्रेष्ठले ‘वर्ल्ड एथ्लेटिक्स कन्टिनेन्टल टुर सिल्भर २०२६’ मा कांस्य पदक जितिन्

भारतको भुवनेश्वरमा शनिबार सम्पन्न ‘वर्ल्ड एथ्लेटिक्स कन्टिनेन्टल टुर सिल्भर २०२६’ मा नेपालकी सन्तोषी श्रेष्ठले महिला ५००० मिटर दौडमा कांस्य पदक जितिन्। उनले निर्धारित दूरी १७ मिनेट ३१.७५ सेकेन्डमा पूरा गर्दै पदक हासिल गरिन्। यस विधामा केन्याकी डिएना वान्जाले स्वर्ण पदक र भारतकी भारतीले रजत पदक प्राप्त गरिन्। वान्जाले १५ मिनेट १६.११ सेकेन्ड र भारतीले १५ मिनेट ४६.४५ सेकेन्डमा दूरी पूरा गरिन्।

सन्तोषीले गत अक्टोबरमा राँचीमा भएको साउथ एसियन एथ्लेटिक्स च्याम्पियनसिपमा १६ मिनेट ३६.६१ सेकेन्डमा नयाँ राष्ट्रिय कीर्तिमान बनाएकी थिइन्। हाल जापानमा आयोजना हुन लागेको २०औं एसियन गेम्सको तयारीमा रहेका सन्तोषीले वर्ल्ड एथ्लेटिक्सको सिल्भर लेभल प्रतियोगितामा पदक जित्दै इतिहास रचेकी छन्। उनले महिला एथ्लेटिक्समा म्याराथन, हाफ म्याराथन, १० हजार मिटर, ५ हजार मिटर र १५०० मिटर विधामा राष्ट्रिय कीर्तिमान बनाइसकेकी छिन्।