लेखक सूचना
भारतीय स्थलसेनाध्यक्ष धीरज सेठ नेपाल भ्रमण गरी फर्किएपछि, अवकाशप्राप्त गोर्खा सैनिकहरूले प्रधानमन्त्री वालेन्द्र शाह ‘बालेन’लाई भेटेर भारतीय सेनामा भर्ती खुलाउने विषयमा ध्यानाकर्षण गराउन चाहेका छन् र त्यसका लागि विभिन्न सम्पर्क सूत्रहरू प्रयोग गरिरहेका छन्। भारतले अग्निपथ योजनाअनुसार आफ्ना फौजहरूलाई चार वर्षको सेवा अवधि तोकेर नियुक्त गर्ने र त्यसपछि २५ प्रतिशत बाहेक अन्यलाई निश्चित रकम उपलब्ध गराएर बिदा गर्ने ‘अग्निपथ’ नीति एकैपक्षीय रूपमा लागू गरेपछि नेपालबाट हुने गोर्खा भर्ती अवरुद्ध भएको छ।
भारतीय स्थलसेनाध्यक्षले नेपाली सेनाको महारथी मानार्थ उपाधि ग्रहण गर्न भर्खरै नेपाल भ्रमण गरेका थिए। उनी पोखरामा भूतपूर्व गोर्खाहरूको कार्यक्रममा सहभागी हुँदा कतिपय अवकाशप्राप्त सैनिकहरूले ‘अग्निपथ’ सम्बन्धमा उनले कुरा उठाएका थिए। उनले गोर्खाहरूको प्रशंसा गरे पनि सोझो उत्तर भने दिएनन्। प्रधानमन्त्री शाहसँग पनि भेटवार्ता भए तापनि औपचारिक छलफलमा रोकिएको भर्तीको विषय प्रवेश पाएको छैन भन्ने विवरणहरू आएका छन्।
अग्निपथ अन्तर्गत नेपालीहरूलाई भारतीय सेनामा नियुक्ति दिनुपर्ने माग गर्दै अघिल्लो महिना लमजुङबाट प्रदर्शन सुरु गरेका अवकाशप्राप्त गोर्खा सैनिकहरूले सेठको नेपाल भ्रमण अगाडि पोखरामा प्रदर्शन गरेका थिए। सन् २०२२ मा अग्निपथ योजना कार्यान्वयनमा आएसँगै भारतले युवा, दक्ष, अनुशासित र प्रविधि कौशलसहितको फौजहरूले भविष्यका युद्धकौशलसँग सम्बन्धित चुनौतीहरू सामना गरिरहेको बताएको थियो।
अवकाशप्राप्त गोर्खा सैनिकका एक नेताले भारतीय सेनाध्यक्षले पोखरामा गोर्खा भर्तीबारे कुनै टिप्पणी नगरेको भन्दै अब आफूहरूले नेपालको उच्च राजनीतिक नेतृत्वलाई आफ्ना मागबारे ध्यानाकर्षण गराउन चाहेको बताए। लमजुङ भारतीय भूतपूर्व सैनिक विकास समितिका सल्लाहकार रहेका अवकाशप्राप्त सुबेदार मेजर खेमजङ्ग गुरुङले भने, “अब हाम्रो प्रयास दबाब दिन केन्द्रित हुनेछ। हामी प्रधानमन्त्रीलाई भारत जानुअघि राम्रोसँग बुझाउन चाहन्छौँ।”
