इरानी संसद्ले होर्मुज स्ट्रेट हुँदै जाने जहाजहरूबाट समुद्री सेवा शुल्क लिन प्रस्ताव स्वीकृत गरेको छ। इरानले शुल्कको बदला सुरक्षा, बिमा, वातावरणीय सेवा र विशेष अवस्थामा इन्धन उपलब्ध गराउने जनाएको छ। ८ भदौ, काठमाडौं। मेहर समाचारका अनुसार, होर्मुजबाट आवतजावत गर्न अनुमति प्राप्त देशका जहाजहरूमध्ये समुद्री सेवाहरूका लागि शुल्क लाग्नेछ। इरानी संसद्को राष्ट्रिय सुरक्षा तथा विदेशनीति समितिका प्रवक्ता हसन काश्कवीका अनुसार, शुल्क तिर्दा समुद्री सेवा, सुरक्षा, बिमा लगायतका सुविधा उपलब्ध गराइनेछ। वातावरणीय सेवा र विशेष परिस्थितिमा इन्धन पनि उपलब्ध गराइने व्यवस्था गरिएको छ। शुल्क भुक्तानी इरानी रियाल वा इरानले रोजेको अन्य मुद्रा मार्फत गर्न सकिनेछ।
अमेरिकी अर्थमन्त्री स्कट बेसेन्टले ट्रम्प प्रशासनले इरानविरुद्धको आर्थिक युद्धको अन्तिम चरणमा पुगेको बताएका छन्। उनका अनुसार अमेरिकाको मुख्य उद्देश्य इरानका प्रमुख आम्दानीका बाटाहरूलाई रोक्नु हो। बेसेन्टले भनेका छन् कि अमेरिकाले इरानमाथि दबाब बढाउन आफ्ना सबै सरकारी निकाय र अधिकार प्रयोग गर्नेछ। उनले यस अभियानलाई ‘इकोनोमिक डी-डे’ को नाम दिएका छन्।
इरानले अमेरिकाका आर्थिक प्रतिबन्धमा साथ दिने खाडी क्षेत्रका मुलुकहरूलाई चेतावनी दिएको छ। नयाँ राष्ट्रिय सुरक्षा प्रमुख मोहसेन रेजाईले भनेका छन् कि अमेरिकालाई आर्थिक प्रतिबन्ध लगाउन सहयोग गर्ने देशहरूलाई शत्रु मानिनेछ। रेजाईले ती देशहरूका आर्थिक हितलाई नोक्सान पुर्याउन समेत सक्षम हुने चेतावनी दिएका छन्। उनले भनेका छन् कि यदि अमेरिकी आर्थिक दबाब जारी रह्यो भने इरानले यस क्षेत्रमा एक थोपा पनि तेल निर्यात गर्न दिइने छैन।
