अस्ट्रेलियाका सबै राजधानी शहरहरूमा एउटा युनिट भाडामा लिन औसत आम्दानीको ५० प्रतिशतभन्दा बढी खर्च हुन थालेको तथ्यांक सार्वजनिक भएको छ। एभ्रिबडिज होमको प्रतिवेदनअनुसार, वार्षिक ७० हजार अस्ट्रेलियाली डलर कमाउने व्यक्तिले औसत भाडा तिर्न ५६ प्रतिशत, ४० हजार कमाउनेले ८९ प्रतिशत र १ लाख कमाउनेले ४१ प्रतिशत आम्दानी छुट्याउनुपर्छ।
प्रतिवेदनले देखाएको छ कि अस्ट्रेलियाका आठवटै राजधानी शहरमा औसत आम्दानी गर्ने व्यक्तिले युनिटको औसत भाडा तिर्न आफ्नो आयको कम्तीमा ५१ प्रतिशत खर्च गर्नुपर्ने अवस्था छ। सिड्नीमा भने यो अनुपात अझै बढी छ, जहाँ वार्षिक ७० हजार अस्ट्रेलियाली डलर कमाउने व्यक्तिले आफ्नो आम्दानीको ६९ प्रतिशत हिस्सा साप्ताहिक घरभाडामा खर्च गर्नुपर्ने बताइएको छ।
अस्ट्रेलियाली तथ्यांक विभागका अनुसार अगस्ट २०२५ सम्म अस्ट्रेलियामा कर्मचारीको औसत वार्षिक तलब ७४ हजार १०० अस्ट्रेलियाली डलर थियो। आवास वकालत समूहकी प्रतिनिधि माई अजिजले सरकारले सार्वजनिक र सामुदायिक आवास निर्माणबाट पछि हटेकाले गम्भीर आवास संकट उत्पन्न भएको बताइन। उनका अनुसार, आगामी १५ वर्षमा करिब १० लाख यस्ता घर आवश्यक पर्नेछ।
