नेपाली कराते टोलीले जापानको टोकियोमा सेप्टेम्बर ६ देखि १६ सम्म प्रशिक्षण गरी एसियाडका लागि तयारी गर्ने भएको छ। एसियाड करातेमामा राकेश मानन्धर, मिनबहादुर तामाङ, तेन्जिङ शेर्पा, एरिका गुरुङ, निरुपा दोङ तामाङ र सानुमाया थिङले नेपालको प्रतिनिधित्व गर्नेछन्। टोलीलाई शुक्रबार त्रिभुवन अन्तर्राष्ट्रिय विमानस्थलमा मन्त्री सस्मित पोखरेलसहितका प्रमुख पदाधिकारीहरूले बिदाइ गरेका थिए। १९ भदौ, काठमाडौं।
नेपाली कराते टोलीले जापानमा हुन लागेको २०औं एसियाली खेलकुदको थप तयारी जापानमै गर्ने भएको छ। जापानको टोकियोस्थित विश्व सितोरियो कराते मुख्य डोजोमा टोली सेप्टेम्बर ६ देखि १६ तारिखसम्म प्रशिक्षणरत रहनेछ। टोली शुक्रबार जापान प्रस्थान गरेको छ। एसियाडमा नेपालबाट सहभागी हुने २२ प्रतिस्पर्धीमध्ये जापान जाँदै गरेको कराते टोली पहिलो हो। टोकियोबाट कराते टोली एसियाडमा सहभागी हुन सेप्टेम्बर १७ तारिख नागोया पुग्नेछ। कराते प्रतियोगिता सेप्टेम्बर २० देखि २३ तारिखसम्म हुनेछ।
पुरुष ५५ केजीमुनि राकेश मानन्धर, ६० केजीमुनि मिनबहादुर तामाङ, र ८४ केजीमाथि तेन्जिङ शेर्पाले प्रतिस्पर्धा गर्नेछन्। महिला ६८ केजीमाथि १९ औं एसियाडकी ऐतिहासिक रजत पदक विजेता एरिका गुरुङ, ६८ केजीमुनि निरुपा दोङ तामाङ, र एकल कातामा सानुमाया थिङले नेपालको चुनौती प्रस्तुत गर्नेछन्। सानुमायासहित एलिसा रास्कोटी र मेघा लिम्बूले टिम कातामा पनि सहभागिता जनाउनेछन्। प्रशिक्षकमा कुशल श्रेष्ठ र मन्डेकाजी श्रेष्ठ छन्।
एसियाडको करातेपछि यही टोली जापानकै योकोहामामा सेप्टेम्बर २५ देखि २७ तारिखसम्म विश्व सितोरियो कराते महासंघको आयोजना अनुसार हुने ११ औं सितोरियो कराते अन्तर्राष्ट्रिय च्याम्पियनसिपमा सहभागी हुनेछ। एसियाली खेलकुदको फरक संस्करणमा नेपालले अहिलेसम्म १ रजत र ३ कांस्य पदक जितेको छ। टोलीलाई शिक्षा तथा खेलकुद मन्त्री सस्मित पोखरेल, राष्ट्रिय खेलकुद परिषद् (राखेप) का उपाध्यक्ष विशाल श्रेष्ठ, राखेपका सदस्य–सचिव रामचरित्र मेहता, शिक्षा तथा खेलकुद मन्त्रालयका प्रमुख सल्लाहकार सिद्धी व्यञ्जनकार र सल्लाहकार राजु सिंह, राखेपका पूर्व सदस्य–सचिव एवं नेपाल कराते महासंघका अध्यक्ष युवराज लामा, राखेप कार्यकारी समितिका सदस्य सिक्का सुवाल श्रेष्ठ, नेपाल कराते महासंघका महासचिव दावा गुरुङलगायतले शुक्रबारै त्रिभुवन अन्तर्राष्ट्रिय विमानस्थलमा बिदाइ गरेका थिए। कार्यक्रममा मन्त्री पोखरेलले खेलाडीबाट ठूलो आशा राखे पनि बिना दबाब प्रतियोगितामा सहभागिता जनाउन आग्रह गर्दै उत्कृष्ट नतिजाका लागि शुभकामना दिएका थिए। ऐतिहासिक पदक विजेता एरिका गुरुङले एसियाली खेलकुद महत्वपुर्ण प्रतियोगिता भएको भन्दै उत्कृष्ट नतिजा हासिल गर्ने प्रयासमा रहेकी छिन्।
