जेनजी आन्दोलनका नोक्सानीमा बीमा दाबीको केवल ३८ प्रतिशत भुक्तानी, ढिलाइको कारण के हो?

जेनजी आन्दोलनमा ३ हजार ३ सय ९० जनाले २३ अर्ब १९ करोड रुपैयाँ बराबरको बीमा दाबी गरेका छन्, तर अहिलेसम्म ८ अर्ब ८२ करोड मात्र भुक्तानी भइसकेको छ। भाटभटेनीले ८ अर्ब दाबी गरेकोमा हालसम्म साढे २ अर्ब मात्र पाएको छ भने हिल्टन होटलको ५ अर्ब दाबी अदालतमा पुगेको छ। नेपाल बीमा प्राधिकरणका अनुसार, सर्भेयरको मूल्याङ्कन, कागजात प्रक्रिया र पुनर्बीमा सम्बन्धी प्रक्रिया कारणले गर्दा बीमा दाबी भुक्तानीमा ढिलाइ भइरहेको छ। २३ भदौ, काठमाडौं।

जेनजी आन्दोलनमा भएको नोक्सानीमा बीमितहरूले गरेको दाबीको एक वर्ष बितिसक्दा पनि पूर्ण भुक्तानी पाउन सकेका छैनन्। २०८२ साल भदौ २३ र २४ गतेका दिनको जेनजी आन्दोलनमा बीमा गरिएको २३ अर्ब रुपैयाँ बराबरको सम्पत्तिमा क्षति पुगेको भएता पनि बीमितहरूले करिब ९ अर्ब मात्रै दाबी भुक्तानी पाएका छन्। नेपाल बीमा प्राधिकरणका अनुसार जेनजी आन्दोलनबाट क्षति पुगेका ३ हजार ३ सय ९० जनाले क्षतिपूर्ति माग गरेका छन्।

अहिले सम्म बीमा क्षेत्रमा २३ अर्ब १९ करोड रुपैयाँ बराबरको दाबी परेको छ। आन्दोलन भएको एक वर्ष पूरा हुँदा, बीमा कम्पनीहरूले गत असार २२ गतेसम्म कुल ८ अर्ब ८२ करोड रुपैयाँ मात्र भुक्तानी गरेका छन्, जुन दाबीको कुल ३८ प्रतिशत मात्र हो। बीमा दाबीमा बीमितले माग गरे अनुसार सबै रकम भुक्तानी नहुन सक्ने प्राधिकरणका एक अधिकारीले स्पष्ट पार्दै भने।

‘बीमितले क्षतिपूर्ति माग गरेपछि कम्पनीले क्षतिको मूल्याङ्कन गरेर मात्रै भुक्तानी दिन्छन्, मूल्याङ्कनको क्रममा कतिपय दाबीको भुक्तानी नदिनुपर्ने वा माग गरेजति दिन नपर्ने अवस्था पनि आउँछ,’ ती अधिकारीले भने। जेनजी आन्दोलनमा सरकारी तथा निजी सम्पत्तिमा आगजनी र तोडफोड भएको थियो। आन्दोलनका कारण कुल करिब ८४ अर्ब रुपैयाँ बराबरको क्षति भएको थियो।