नेपालले बङ्गलादेशसँग द्विपक्षीय टी–२० क्रिकेट शृंखला आयोजना गर्ने औपचारिक प्रस्ताव ढाकामा भएको भेटवार्तामा अघि सारेको छ। बङ्गलादेशका राज्यमन्त्री अमिनुल हकले प्रस्तावलाई सकारात्मक रूपमा लिँदै नेपाललाई औपचारिक आशयपत्र पठाउन आग्रह गरेका छन्। भेटमा दुवै पक्षले खेलकुद र सांस्कृतिक आदानप्रदान साथै पर्वतारोहण र उच्च भूभाग प्रशिक्षणमा सहकार्य विस्तार गर्ने विषयमा छलफल गरेका छन्। २६ भदौ, काठमाडौं। नेपालले बङ्गलादेशसँग द्विपक्षीय टी–२० क्रिकेट शृंखला आयोजना गर्ने औपचारिक प्रस्ताव अगाडि बढाएको छ। बङ्गलादेशका लागि नेपाली राजदूत घनश्याम भण्डारी र बङ्गलादेशका युवा तथा खेलकुद राज्यमन्त्री अमिनुल हकबीच ढाकामा बिहीबार भएको भेटवार्ताका क्रममा भण्डारीले उक्त प्रस्ताव अघि सारेका हुन्। मन्त्री हकले सो प्रस्तावलाई सकारात्मक रूपमा लिँदै बङ्गलादेश क्रिकेट बोर्ड (बीसीबी) सँग छलफल अघि बढाउने बताएका छन्। भण्डारीले भेटका क्रममा हालै नेपालको विनाशकारी बाढीपछि बङ्गलादेश सरकारले गरेको समयमै सहयोगका लागि धन्यवाद व्यक्त गरेका थिए। भण्डारीले नेपाल र बङ्गलादेशबीच उत्कृष्ट राजनीतिक सम्बन्ध रहेको उल्लेख गर्दै खेलकुद र सांस्कृतिक आदानप्रदानमार्फत द्विपक्षीय सम्बन्ध अझ सुदृढ बनाउन सकिने बताए। उनले पछिल्लो समय दुवै देशबीच कुनै द्विपक्षीय क्रिकेट शृंखला नभएको उल्लेख गर्दै टी–२० शृंखला आयोजना गर्न प्रस्ताव राखेका थिए। ‘हाम्रो टोली बङ्गलादेश आउन पूर्ण रूपमा तयार छ, र बङ्गलादेशलाई नेपालमा पनि हार्दिक स्वागत गर्नेछौँ,’ राजदूत भण्डारीले भने। प्रस्तावप्रति सकारात्मक प्रतिक्रिया दिँदै राज्यमन्त्री अमिनुल हकले खेलकुद कूटनीतिलाई क्षेत्रीय सहकार्यको प्रभावकारी माध्यमका रूपमा बङ्गलादेशले प्राथमिकता दिएको बताए। उनले प्रक्रिया अघि बढाउन नेपाललाई औपचारिक आशयपत्र पठाउन आग्रह गर्दै त्यसपछि मन्त्रालयले बीसीबीसँग आवश्यक छलफल सुरु गर्ने जानकारी दिएका छन्। भेटका क्रममा राज्यमन्त्री हकले पर्वतारोहण र उच्च भूभाग प्रशिक्षणमा नेपालसँग सहकार्य विस्तार गर्ने प्रस्ताव पनि राखेका थिए।
सम्बन्धित खबर
