बागमती प्रदेशका मुख्यमन्त्री किरण थापा मगर र उद्योग वाणिज्य महासंघका अध्यक्ष अञ्जन श्रेष्ठबीच टेकुमा विपद्पछि उद्योग–व्यवसाय पुनर्स्थापना, लगानी वातावरण र रोजगारी विषयमा छलफल भएको छ। श्रेष्ठले ‘विपद् रोजगार बैंक’ स्थापना, सिपमूलक तालिम र प्रभावित क्षेत्रमा नयाँ बजार विकासमा महासंघ सहयोगका लागि तयार रहेको जनाएका छन्। मुख्यमन्त्री थापाले प्रभावित क्षेत्रको पुनर्निर्माण, बालबालिकाको शिक्षा र पूर्वाधार विकासमा निजी क्षेत्रसँग सार्वजनिक–निजी साझेदारी (पीपीपी) मोडेलमा काम गर्ने प्रस्ताव राखेका छन्। २८ भदौ, काठमाडौं।
बागमती प्रदेशका मुख्यमन्त्री किरण थापा मगर र नेपाल उद्योग वाणिज्य महासंघका अध्यक्ष अञ्जन श्रेष्ठबीच आइतबार महासंघ सचिवालय टेकुमा भेटवार्ता भएको छ। भेटवार्तामा रसुवा सहित विभिन्न जिल्लामा आएको बाढीपहिरोबाट भएको क्षति, प्रभावित उद्योग-व्यवसाय पुनर्स्थापना, लगानी वातावरण, रोजगारी सिर्जना तथा प्रदेशको आर्थिक गतिविधि सक्रिय बनाउने विषयमा छलफल भएको छ। दुवै पक्षले प्रदेशको आर्थिक विकास, निजी क्षेत्रको लगानी विस्तार र उद्यमशीलता प्रवर्द्धनका लागि आपसी समन्वय अझ सुदृढ गर्दै सहकार्यका ठोस क्षेत्र पहिचान गरी आगामी दिनमा फलदायी रूपमा अघि बढ्ने प्रतिबद्धता व्यक्त गरेका छन्।
उक्त अवसरमा महासंघ अध्यक्ष श्रेष्ठले विपद्पछि महासंघ राहत, उद्धार तथा पुनर्स्थापना कार्यमा सक्रिय रहेको उल्लेख गर्दै प्रभावित उद्योग–व्यवसायलाई पुन: सञ्चालन गर्न वातावरण सिर्जना गर्न प्रदेश सरकारसँग सहकार्य गर्न महासंघ तयार रहेको बताए। उनले भने, “प्रदेश सरकारसँगको सहकार्य थप प्रभावकारी बनाउन, बागमती प्रदेशमा लगानी र उद्यमशीलता विस्तार गर्न महासंघ सकारात्मक छ। स्थानीय स्तरमा नयाँ बजार स्थापना, अस्पताल स्थापना तथा विद्यालय पुनर्निर्माणमा पनि काम गर्न इच्छुक छौं।”
मुख्यमन्त्री थापाले प्रभावित क्षेत्रको पुनर्स्थापना तथा पुनर्निर्माणमा निजी क्षेत्रको योगदान सराहनीय रहेको बताए। विपद्मा परेका बालबालिकाको शिक्षा, रोजगारी सिर्जना तथा स्थानीय अर्थतन्त्र पुनर्जीवनका लागि महासंघसँग सहकार्य आवश्यक रहेकोमा जोड दिए। उनले बागमती प्रदेशका सडक तथा अन्य पूर्वाधार विकासमा सार्वजनिक-निजी साझेदारी (पीपीपी) मोडेलमा काम गर्न सकिने प्रस्ताव समेत राखेका छन्।
