युक्रेनको पोल्यान्ड सीमाना नजिक याहोदिन रेल स्टेशनमा रोकिएको रेलको इन्जिनमा रुसी ड्रोनले प्रहार गर्दा क्षति पुगेको छ। आक्रमण हुनु अघि केही क्षण अगाडि बोरिस जोन्सन, कार्ल बिल्टसहित युरोपेली सङ्घका सुरक्षा सल्लाहकारहरू सवार कूटनीतिक रेल सोही क्षेत्रबाट गुज्रिएको थियो। युक्रेनको सरकारी रेल सेवा कम्पनीले कूटनीतिक रेल नै सम्भावित लक्ष्य हुन सक्ने जानकारी दिएको छ, तर स्वतन्त्र पुष्टि भइसकेको छैन। २९ भदौ, किएभ (रासस/सिन्ह्वा)।
युक्रेनको पोल्यान्ड सीमाना नजिक रुसी ड्रोनले एउटा रेलमा आक्रमण गरेको छ। आक्रमण गर्नु भन्दा केही समय अगाडि वरिष्ठ विदेशी अधिकारीहरू सवार कूटनीतिक रेल सोही क्षेत्रबाट अघि बढेको युक्रेनको सरकारी रेल सेवा कम्पनीले बताएको छ। आइतबार पोल्यान्डसँगको सीमाना नजिक रहेको याहोदिन रेल स्टेशनमा रोकिएको रेलको इन्जिनलाई रुसी ड्रोनले प्रहार गरेको थियो। आक्रमणपछि इन्जिनलाई क्षति पुगेको जनाइएको छ।
घटना भएको समयमा त्यो क्षेत्रमा उच्च तहका विदेशी अधिकारीहरूको आवतजावत भइरहेको थियो। युक्रेन भ्रमणमा रहेका बेलायतका पूर्वप्रधानमन्त्री बोरिस जोन्सन, स्विडेनका पूर्वप्रधानमन्त्री कार्ल बिल्ट तथा विभिन्न युरोपेली सङ्घ सदस्य राष्ट्रका सुरक्षा सल्लाहकारहरू कूटनीतिक रेलमार्फत यात्रा गर्दै थिए। उनीहरू युक्रेनको राजधानी किएभमा आयोजित सुरक्षा सम्मेलनमा सहभागी भएर फर्किँदै थिए।
रेल सेवा कम्पनीका अनुसार कूटनीतिक रेलले निर्धारित समयभन्दा केही अघि याहोदिन स्टेशन छाडेको थियो। त्यसको केही समयपछि त्यही क्षेत्रमा ड्रोन आक्रमण भएको हो। यद्यपि आक्रमण कूटनीतिक रेललाई नै लक्षित गरेर गरिएको थियो भन्ने विषयमा स्वतन्त्र पुष्टि भइसकेको छैन। युक्रेनले घटनालाई गम्भीर सुरक्षा घटनाका रूपमा लिएको छ। आक्रमणपछि सम्बन्धित रेलमार्ग तथा संरचनाको अवस्थाबारे सुरक्षा निकायले मूल्याङ्कन गरिरहेको जानकारी दिएको छ।
