समाचार संक्षेप: स्ट्रेट अफ होर्मुजमा अक्टोबर ११ मा दुई तेल ट्यांकरमाथि आक्रमण हुँदा दुई भारतीय नाविक बेपत्ता भएका छन्। निकारागुआको झण्डा रहेको ‘एमटी पेट्रो डल्फिन’ मा सवार ११ भारतीयमध्ये दुई जना बेपत्ता भएका छन् भने ‘एमटी भाल्थेरा’ का सबै ११ भारतीय सुरक्षित उद्धार भएका छन्। भारतको विदेश मन्त्रालयले व्यावसायिक जहाजमाथि आक्रमणको कडा निन्दा गर्दै विवाद समाधानका लागि संवाद र कूटनीतिक माध्यम अपनाउन आग्रह गरेको छ। २६ असोज, काठमाडौं।
स्ट्रेट अफ होर्मुज क्षेत्रमा दुई तेल ट्यांकरमाथि ड्रोन र अज्ञात प्रक्षेप्यास्त्रको आक्रमण हुँदा दुई भारतीय नाविक बेपत्ता भएका छन्। अर्को जहाजमा रहेका सबै ११ भारतीय सुरक्षित उद्धार भएका छन्। भारतको विदेश मन्त्रालयका अनुसार अक्टूबर ११ मा दुई छुट्टाछुट्टै तेल ट्यांकरमाथि आक्रमण भएको थियो। निकारागुआको झण्डा लागेको ‘एमटी पेट्रो डल्फिन’मा ड्रोनबाट प्रत्यक्ष आक्रमण भएको थियो। उक्त जहाजमा सवार ११ भारतीय मध्ये दुई जना बेपत्ता छन्। त्यस्तै, मार्शल आइल्यान्ड्सको झण्डा भएको अर्को तेल ट्यांकर ‘एमटी भाल्थेरा’मा आक्रमण हुँदा आगलागी भएको थियो। सबै ११ भारतीय नाविकहरू सुरक्षित रहेको विदेश मन्त्रालयले जनाएको छ।
बेपत्ता भारतीय नाविकहरूको खोजी जारी छ। ओमानको मस्कटस्थित भारतीय दूतावासले बेपत्ता दुई नाविकको खोजी र उद्धारका लागि ओमानका सम्बन्धित अधिकारी र जहाज व्यवस्थापन कम्पनीसँग समन्वय गरिरहेको छ। दूतावासले सामाजिक सञ्जाल एक्समार्फत ‘एमटी पेट्रो डल्फिन’को अवस्थाबारे निरन्तर निगरानी गरिरहेको जानकारी दिएको छ। प्रभावित जहाजमा रहेका अन्य भारतीय नाविकलाई आवश्यक सहयोग उपलब्ध गराउने काम पनि भइरहेको दूतावासले जनाएको छ।
जहाजमाथिको आक्रमण रोक्न भारतको आग्रह: भारतीय विदेश मन्त्रालयले अन्तर्राष्ट्रिय जलक्षेत्रमा व्यावसायिक जहाजमाथि भइरहेको आक्रमणप्रति गम्भीर चिन्ता व्यक्त गर्दै यस प्रकारका घटनाको कडा निन्दा गरेको छ। विदेशमा कार्यरत भारतीय नाविकहरूको सुरक्षा सरकारको सर्वोच्च प्राथमिकता रहेको उल्लेख गर्दै मन्त्रालयले यस्ता आक्रमणले क्षेत्रीय तनाव थप बढाउन सक्ने चेतावनी दिएको छ। मन्त्रालयले विवाद समाधानका लागि सबै पक्षलाई संवाद र कूटनीतिक माध्यम अपनाउन आग्रह गरेको छ। साथै, अन्तर्राष्ट्रिय कानुनअनुसार समुद्री व्यापार र आवागमनको स्वतन्त्रता कायम राख्न आवश्यक रहेकोमा जोड दिंदै जहाज, नाविक र सर्वसाधारणका पूर्वाधारमाथिका आक्रमण तत्काल रोक्न आह्वान गरेको छ।
सम्बन्धित खबर
