अस्ट्रेलियाका मिचेल स्टार्क दक्षिण अफ्रिकाविरुद्धको तेस्रो टेस्टमा ९ विकेट लिएर आईसीसी टेस्ट बलिङ वरीयताको शीर्ष स्थानमा फर्किएका छन्। तेस्रो टेस्टमा १० विकेट लिएका दक्षिण अफ्रिकाका साइमन हार्मर बलिङ वरीयतामा सातौं र अलराउन्डर वरीयतामा पाँचौं स्थानमा उक्लिएका छन्। आईसीसीले जारी गरेको पछिल्लो वरीयतामा पाकिस्तानका फखर जमान, भारतका श्रेयस अय्यर र अफगानिस्तानका अजमतुल्लाह ओमरजाईले पनि उल्लेख्य सुधार गरेका छन्। १८ कात्तिक, काठमाडौं।
अस्ट्रेलियाका पेस बलर मिचेल स्टार्क आईसीसी टेस्ट बलिङ वरीयताको शीर्ष स्थानमा फर्किएका छन्। दक्षिण अफ्रिकाविरुद्धको तेस्रो टेस्टमा उत्कृष्ट प्रदर्शन गरेपछि स्टार्कले शीर्ष स्थानमा रहेका दक्षिण अफ्रिकी अलराउन्डर मार्को यान्सेनलाई पछि पारेका हुन्। केप टाउनमा भएको तेस्रो टेस्टमा अस्ट्रेलिया १७६ रनले पराजित हुँदै शृंखला २–१ ले गुमाएको थियो। तर स्टार्कले पहिलो इनिङ्समा ७२ रन खर्चेर ६ विकेट र दोस्रो इनिङ्समा ६५ रन खर्चेर तीन विकेट लिएका थिए। यस प्रदर्शनसँगै उनी टेस्ट बलिङ वरीयताको पहिलो स्थानमा उक्लिएका हुन्।
यान्सेन गत साता पहिलोपटक शीर्ष स्थानमा पुगेका थिए। तेस्रो टेस्टमा १० विकेट लिएका दक्षिण अफ्रिकाका साइमन हार्मर वरीयतामा नौ स्थान सुधार गर्दै सातौं स्थानमा पुगेका छन्। उनको रेटिङ ८१७ पुगेको छ। दक्षिण अफ्रिकाका स्पिनरमध्ये यो दोस्रो उच्च रेटिङ हो। यसअघि ह्यु टेफिल्डले सन् १९५७ फेब्रुअरीमा ८९५ रेटिङ बनाएका थिए। हार्मर टेस्ट अलराउन्डर वरीयतामा पनि तीन स्थान माथि उक्लँदै पाँचौं स्थानमा पुगेका छन्। यस सूचीमा यान्सेन पहिलो र वियान मुल्डर तेस्रो स्थानमा छन्।
बंगलादेश र वेस्ट इन्डिजबीच ढाकामा भएको पहिलो टेस्टको प्रदर्शनले पनि वरीयतामा प्रभाव पारेको छ। वेस्ट इन्डिजका जोमेल वारिकन नौ विकेट लिँदै प्लेयर अफ द म्याच बनेपछि बलिङ वरीयतामा ६ स्थान सुधार गर्दै ३०औं स्थानमा पुगेका छन्। बंगलादेशका नइम हसन चार स्थान सुधार गर्दै ४७औं र शोरिफुल इस्लाम तीन स्थान माथि उक्लँदै ५४औं स्थानमा पुगेका छन्।
सम्बन्धित खबर
