युरोपमा बमको झुटो धम्कीले दर्जनौं उडान प्रभावित, सुरक्षामा लडाकु जेटसमेत परिचालन

फ्रान्सको सैन्य विमानस्थलमा डाइभर्ट गरिएको रोम उड्ने एर लिङ्गसको विमानबाट यात्रुहरू बाहिर निस्कँदै। युरोपका विभिन्न देशमा बमको झुटा धम्कीपछि बिहीबार २१ भन्दा बढी हवाई सेवा प्रभावित भएका छन्। धम्कीपछि केही विमानको मार्ग परिवर्तन र केहीको आपत्कालीन अवतरण गराइएको छ भने कुनै पनि विमानमा विस्फोटक पदार्थ फेला परेको छैन। बेलायतकी यातायातमन्त्री हेइडी अलेक्जेन्डरले घटनालाई ‘दुर्भावनापूर्ण झुटो धम्की’ भनेकी छन्। २० कात्तिक, काठमाडौं।

युरोपका विभिन्न देशमा उडान गरिरहेका विमानमा बम राखिएको भन्दै धम्की आएपछि विहीबार एकैदिन २१ भन्दा बढी हवाई सेवा प्रभावित भएको छ। गत मंगलबार पनि यस्तै धम्कीका कारण युरोपका कम्तीमा २५ वटा उडान प्रभावित भएका थिए। पछिल्लोपटक आएको धम्कीका कारण केही विमानको उडान मार्ग परिवर्तन गरिएको छ भने केहीलाई आपत्कालीन अवतरण गराइएको छ। धम्कीका कारण कतिपय देशमा लडाकु जेट विमानसमेत परिचालन गर्नुपरेको बीबीसीले जनाएको छ।

विभिन्न विमानस्थलका अधिकारीका अनुसार धम्कीपछि गरिएको सुरक्षा जाँचमा अहिलेसम्म कुनै पनि विमानमा विस्फोटक वा शंकास्पद वस्तु फेला भने परेको छैन। इटालीको रोमस्थित विमानस्थलमा रोम आउन लागेका विमानलाई लक्षित गरी इमेलमार्फत धम्की आएको थियो। उक्त इमेल आफूलाई ‘फाइटर्स अफ द मेल स्टेट’ बताउने समूहका तर्फबाट पठाइएको थियो। समूहले आफूहरू नारीवादी शासन व्यवस्थालाई निशाना बनाइरहेको दाबी गरेको थियो। चेक गणतन्त्रको प्रागमा बमको धम्कीपछि अवतरण गरेका चारवटा विमानमा प्रहरीले सुरक्षा जाँच गरेको थियो।

लडाकु जेटसमेत परिचालित धम्कीपछि विमानको सुरक्षाका लागि विभिन्न देशका वायुसेनाले लडाकु विमान परिचालन गरेका थिए। इटालीको वायुसेनाले हेलसिन्कीबाट रोम आउँदै गरेको फिनएयरको विमानलाई लडाकु जेटमार्फत सुरक्षा दिएको थियो। उक्त विमानलाई क्रोएसियाको वायुसेनाले आफ्नो हवाई क्षेत्रमा प्रवेश गरेपछि इटालीको वायुसेनालाई जिम्मा लगाएको थियो। यस्तै, बुल्गेरियातर्फ गइरहेका र्यानएयरका तीनवटा विमानलाई पनि सैन्य विमानले सुरक्षा दिएका थिए।

डब्लिनबाट रोमका लागि उडेको एर लिङ्गसको विमानलाई भने फ्रान्सको इभ्रुस्थित सैन्य विमानस्थलमा डाइभर्ट गरिएको थियो। फ्रान्सेली प्रधानमन्त्री सेबास्टियन लेकोर्नुको कार्यालयका अनुसार विमान सुरक्षित अवतरण गरेपछि विस्फोटक पदार्थ निष्क्रिय पार्ने टोलीले जाँच गरेको थियो। युरोपमा विमानमा बम राखिएको भन्दै झुटा धम्की आउनु नयाँ घटना नभए पनि एकै दिन यति धेरै उडान प्रभावित हुनु असामान्य रहेको अधिकारीहरूले बताएका छन्।